Musikaz betetako igandea izango da
Herrian Karnaba otxoteak, Donostiako Orkestra Barrokoa eta Udal Txistulari Taldea arituko dira.
Karnabako kideak artxiboko irudi batean. Argazkia: Karnaba Musikaz betea dator herriko igandea. Hiru emanaldi handi izango dira. Lehenean, Karnaba otxoteak Eguberriko kontzertua egingo du Madalenaren ermitan, 12:00etan hasita. Ez da bakarrik ariko, Donostiako Orkestra Barrokoa izango baitu lagun.
Ordu erdi geroago, Herri Arte Eskolan, bertako ikasleek eta Udal Txistulari Taldeak (aurretik diana egingo dute Pontikan, 09:00etan) emanaldia egingo dute, Euskal mitologiako kondaira musikatuak izenburuko ikuskizunean.
Igande musikatua ixteko, EMKEren Gabon magikoak ikuskizuna Lekuonan (19:00): herriko bandak eta lau magok (Marsel, Peio Rivas, Asier Kidam eta Javier Agirre) magia jarriko diete astearen bukaerako azken orduei.
