Oiartzuarrak ‘lehen aldiak’ Orgasmorekin gozatzera deitu dituzte
Oiartzungo gazte sortzaileek lehen aldietan oinarritutako emanaldi multidiziplinarra antolatu dute hilaren 30erako. Orgasmoren urteko saio nagusia izango da.
Orgasmoko hainbat kide, irailean taularatutako antzezlanean. Oiartzungo Gazte Sortzaileek (Orgasmok) plana proposatu dute hilaren 30erako: Oroitzen al dituzu zure lehenengo aldiak? diziplina asko jasoko dituen emanaldia. Landetxen izango da, 19:26etik aurrera, eta sarrerak salgai daude udalaren sarreren webgunean, 8 euroren truke.
Josu Ibarguren Orgasmoko kideak gogorarazi duenez, orain dela hiru urte sortu zenetik, gauza txiki asko egin dituela Orgasmok, eta urtean behin emanaldi «handixka» bat egitea zela haien «ilusioetako bat».
Lehenengo urtekoa udaran egin zuten, eta hainbat diziplina batu zituzten bertan. Bigarrenak formatu bera izan zuen, baina Xanisteban Egunarekin egitea erabaki zuten, nahiz eta atzeratu egin behar izan zuten. «Aurten ere abenduan egin nahi izan dugu», berretsi du Ibargurenek.
Diziplina artekotasuna mantendu dute, baina beste modu batean taularatuko dute. Ibargurenek azaldu du: «Aurreko emanaldietatik ikasi nahi izan dugu. Aurtengoa pixka bat gidatuagoa izango da, eta aurretik dezente gehiago lotu dugu, osoagoa da. Aurrekoetan emanaldiak gehiago ezberdintzen ziren elkarren artean: egin, eta gero elkartu egiten genituen».
Emanaldiak «zentzu orokorra» izango duela aurreratu du, spoiler-ik egin gabe, baina hiru piezak osatuko dutela gaineratu du. Aurtengoan hainbat diziplinatako hamahiru artista elkartuko dira taula gainean: dantza, musika, literatura, antzerkia… Horrez gain, argazkilari bat ere arituko da klik egiten, oholtzatik kanpo. Lehen aldiak izango da gaia, eta, sortzaileek eurek aurreratu dutenez, Orgasmoren saio baten lehen aldia bada, ez da azkena izango.
