Pepi Berasategik Oroimenaren Frontoia bisitatu du
Aita zenaren hezurrak 1977tik zeuden bertan, eta pasa den hilean identifikatu ondoren, familiari bueltatu zizkioten.
Pepi Berasategik astelehenean bisitatu zuen Oiartzun. Pepi Berasategik 87 urte eman ditu bere aitaren bila. Pasa den hilean, bere aita Hipolitorenak ziren hezurrak identifikatu zituzten. Aitaren gorpuzkiak 1977tik izan ziren Oiartzungo hilerriko Oroimenaren Frontoian, Iragorritik eramanda. 1936an fusilatu zuten Briviescan (Burgos) jaiotako donostiarra.
Urte horietan guztietan hezurrak gorde dituzte Oiartzungo eragileek zein udalak. Hilaren lehen egunean udalak eta Kattin Txikik hezurrak eman zizkioten Aranzadiri, eta haiek —hilaren 9an— familiari helarazi zizkioten, Donostian egindako ekitaldian.
Pepi Berasategik Oiartzungo Oroimenaren Frontoia ezagutzeko aukera izan du. Pasa den astelehenean egin zuen bisita, aitaren hezurrak hainbat urtez gorde ziren tokira. Emozioz gainezka egin zuen bisita. Kattin Txikiko kideek eta udal ordezkariek egin zioten harrera, eta azaldu zioten urte hauetan gorpuak zaindu, identifikatu eta omentzeko herrian burututako lan guztia.
Berasategik kontatu zienez, aita aurkitzeko esperantza galduta zuela aitortu zuen eta bihotz-bihotzez eskertu zuen Oiartzunen egindako esfortzua. “Izugarria izan da eduki duzuen konpromisoa eta txalotzekoa da zuen jarrera. Mila esker borroka honetan bidelagun izateagatik”, gaineratu zuen.
