Egiturari eragin ez badio ere, kalte ugari utzi ditu suteak
Sorgintxulo kaleko 4. zenbakian izandako sutean kaltetuen izan den etxebizitza bisitatu dute gaur, Bernar Lemos alkateorde eta Udaltzaingoaren buruak, udal arkitektoak, eta Udaltzaingoaren buru operatiboak.
Eraikinaren kanpoaldean ikus daitezke kalteak. Zorigaiztokoa izan zen urte hasiera Kaputxinoak auzoko Sorgintxulo kaleko 4. zenbakiko eraikineko bizilagunentzat. Sua piztu zen urte berria hasi eta berehala etxebizitza eraikin horretako zursarean, zantzu guztien arabera, suziri batek sortuta. Hala ere, oraindik ere, ikerketa martxan du Ertzaintzak sua zerk piztu zuen jakiteko.
Gaur bertan, kaltetuena izan den etxebizitzara bisita egin dute Bernar Lemos alkateorde eta Udaltzaingoaren arduradunak, udal arkitektoak, eta gertakarien goizaldean Udaltzaingoaren buru operatibo zenak. Bisita hori kaltetutako etxebizitzaren jabeekin egin dute udal ordezkariek.
Bisitaren ostean, prentsa oharra helarazi du komunikabideetara Errenteriako Udalak. Arkitektoak egiaztatu duenez, suteak ez du kaltetu etxebizitzaren egitura, beraz ez da arriskurik bertan sartzeko; suak eta keak, ordea, kalte material ugari eragin dituzte etxebizitza horretan.
Gainontzeko bizilagunek, sutea izan eta ordu gutxira izan zuten eraikineko gainontzeko etxebizitzetara itzultzeko aukera.
Joan den abenduaren 28an prentsa ohar bidez eskatu zuen Errenteriako Udalak suziriak eta petardoak ez erabiltzeko. Herritarrei artefaktu horiek erabiltzeak dakartzan arriskuak eta zeharkako kalteak gogorarazi zizkien, pertsonei eta zaratarekiko sentikortasun handia duten pertsonei lesioak eragiteko arriskuaz ohartarazi zuen, eta horrelakoak erabiltzeak suteak eragin ditzakeela nabarmen jarri.
Berriro eskatu du udalak, gertatutakoa dela eta, suziri eta petardoak ez erabiltzeko, eta gogorarazi du debekatuta dagoela balkoietatik eta etxebizitzetako leihoetatik suziriak eta petardoak botatzea.
Hilaren 1eko goizaldean gertatutakoa xehetasunez argitzeko ikerketa martxan dela esan du azkenik udalak; Ertzaintza ari da ikerketa hori egiten.
