Erakargarriagoa eta seguruagoa izango da Gabierrota pasealekua
Herritarren topagunerako espazio gehiago izango ditu pasealekuak berrurbanizatzen dutenean. Erakargarriagoa eta seguruagoa ere izango dela azaldu du udalak.
Udalak lizitaziora atera ditu Gabierrota pasealekua berrurbanizatzeko lanak. Milioi bat euro pasa bideratuko ditu lan horietara, eta behin hasita, 16 aste inguru iraungo dutela aurreikusi du. 300 metro luze da pasealekua, hektarea erdiko azalera du eta udalerriko gune garrantzitsuenetako bat dela zehaztu du udalak. Pasealeku horrek, gainera, bi auzo lotzen ditu oinezkoentzat, Gabierrota eta Erdialdea.
Pasealekua berrurbanizatzeko proposamena Gabierrotako Laguntasuna Auzo Elkartearekin eta Jesusen Bihotza egoitzako arduradunekin batera landu du udalak: “Alde batetik, erakargarriagoa eta seguruagoa egin nahi da pertsonentzako, dagoen zoladura hobetuz eta egungo jardinerak kenduz. Bestalde, pasealekuaren erdialdean eta Jesusen Bihotza egoitzaren kanpoaldean egoteko eta elkartzeko espazioak irabaziko dira, espazio publiko horretaz gozatzera gonbidatuko duten ekipamendu eta hiri altzari berriekin”.
Oiartzun ibiarekiko harremana ere hobetuko dela lanekin azaldu du Errenteriako Udalak, ibilgura iristea erraztuz. Horretarako, beste arrapala bat eraikiko dute adinekoen egoitzaren parean. Berdeguneen azalera ere handituko dute berrurbanizatze lanekin, “pasealekuaren azaleraren %36 izango da eta azalera zapalgarri berriak sortuko dira, paisaia hobetzeaz gain drainatze hobea egiteko”.
