Lezo-Jaizkibel, berriz ere gainezka
Ordu gutxian agortu dira berriz ere otsailaren 25eko mendi lasterketako dortsal guztiak. Hilaren 21ean, ibilbidea ezagutzeko topaketa.
2023ko lasterketaren artxiboko irudia. 2024ko lehen orduetan agortu egin ziren Lezo-Jaizkibel mendi lasterketako dortsal guztiak. Otsailaren 25ean egingo dute aurtengo ekitaldia, hamargarrena. Hala, urtero bezala salgai jarritako 350 plazak eta itxaron zerrendakoak bete-bete ziren atzo goizerako; urte berriko 00:00etan zabaldu zuten izen emateen aroa, eta ordu gutxian ‘hegan’ egin zuten dortsalek. Antolatzaileek adierazi dute aztertuko dutela ea merezi duen itxaron zerrenda berriz ere zabaltzea ala ez.
Lasterkariak izanda, orain proba egoki prestatzea tokatzen da. Hala, hilaren 21erako (igandea) ibilbidea ezagutzeko irteera antolatu du antolakuntza taldeak, 09:30ean Gurutze Santuaren plazatik hasita. Han, erritmoaren araberako taldetxoak osatuko dituzte bideari ekin baino lehen. Herrigunean bueltan direnean salda eta mokadutxoa izango dituzte ‘kedadan’ parte hartuko dutenek.
Elkartasun euroa, Mindararentzat
Lezo-Jaizkibelek elkartasun keinua egiten du urtero-urtero. Aurten, dortsalaren prezioaren barruan zegoen elkartasun euroa Mindara elkartearentzat izango da. Dibertsitate Funtzionala duten Pertsonak Artatzeko Gipuzkoako Elkartea da Mindara, eta Errenteria-Oreretan dute egoitza nagusia.
