Zakukada ekitaldirekin dator urte berria
Herriko eragile eta erakundeek ekitaldi sorta polita antolatu dituzte urtarrilerako. Askotariko ekitaldiak izango dira.
Etxerat eta Sareren urteroko bertso saioa datorren igandean izango da. Herriko erakunde eta eragileek ekitaldi sorta polita antolatu dute 2024a ongi hasteko. Ohi bezala, askotariko kultur eskaintza izango da datozen egunetan; batzuk ohikoak izango dira, eta beste batzuk, lehen aldiz egingo dituzte.
Egunotan, ikasleak oporretan dauden bitartean, hainbat ekitaldi egiten ari dira Abaraxka ludotekan. Bihar izango da azkeneko eguna. Gaztetxoentzako jarduerak ere tokia dute agendan.
Urtarrileko azkeneko egunetan pilatuko dira ekitaldiak, progresiboa izango da. Kontxa Murgia Egaña omentzeko ekitaldiak orduan egongo dira, Galizia eta Euskal Herriaren arteko loturak estutzeko. Oiartzungo Antzerkizaleen Elkarteak programatutako hileroko zita hilaren 21ean izango da, eta bi egunera izango Irakurketa Taldearen errepasoa.
Beste ohiko ekitaldiek ez dute hutsik egingo: mutxikoak, Arizmendienea edota parrokia bisitatzeko ibilaldi gidatuak, ikus-entzunezkoen saioak…
Ugaldetxo Kultur Taldeak Pirritx, Porrotx eta Marimotots ekarriko ditu hileko azken aurreko igandean (21ean; agendan oker agertzen da). Hilaren 13an jarriko dituzte salgai sarrerak. Gainera, Alternatiben Oihartzunak Joseba Sarrionandia gonbidatuko du hilaren 26an.
Etxera bertso jaialdia
Datorren igandean, gainera, Etxerat-ek eta Sare-k antolatzen duen ohiko bertso saioa izango da, punta-puntako bertsolariekin. Sarrerak Bibe-ren webgunean eros daitezke, 12 euroren truke. Modu fisikoan erosteko, honako tokietara jo daiteke: Oiartzunen, Elorsoro kiroldegian eta Garmendi txokolategian; Errenteria-Oreretan, Arkaitza tabernan; Donostian, Antigua auzoko Platero taberna eta Hontza liburudendan.
