Udal gobernuaren "lidergo falta" salatu du PSE-EEk
Legealdiko sei hilabeteen gaineko balorazioa egin dute. Pasaiak "alkate erabakitsu bat" behar duela adierazi dute, "pasaitarrek merezi dituzten aukeretan irmoki sinesten duena".
Pasaiako PSE-EE taldeak kezka agertu du EH Bildu eta Podemosen udal gobernuaren “bultzada politiko faltagatik”, lehen sei hilabeteen gaineko balorazioa egin dute. Hedabideei bidalitako ohar batean Teo Alberro alkatearen “lidergo falta” salatu nahi izan dute. Aurreko hilean aurkeztu eta onartutako aurrekontua “arduragabekeriazko ariketa” bat dela esan dute lehenik. PSE-EEk horien kontra bozkatu zuen.
2024rako onartu diren aurrekontuek ondorio negatiboak ekarriko dituela uste dute sozialistek. “Pasaitarren beharrei ez erantzuteaz gain, ez die aurre egiten gure udalerriak dituen egiturazko arazoei”. Sozialistek aurkeztutako zuzenketak ez zituztela kontuan hartu erantsi dute, eta ez dutela udal gobernuaren “interes txikiena ere izan”. “Udal gobernu honek adostasunerako borondatea aldarrikatzen du, baina ez du egia esan nahi”.
Lehen sei hilabete hauek “argazkiak ateratzeko eta aurreko legegintzaldian landutako eta lortutako ekimenak saltzeko bakarrik” baliatu dituztela salatu dute. “Orain iritsi da egiaren garaia, alkatearen lidergo politikoa erakustekoa eta haren erabakiak eta indarrak Pasaiak azken hamarkadan hasitako bideari eustekoa”.
2024a “mamitzeko urte garrantzitsua” dela erantsi dute eta honako proiektuak gauzatzeko premiaz aritu dira: Andonaegi, Luzuriaga, Itsas Jaialdiaren hirugarren edizioa edo duela bi urte Portuko Agintaritzarekin lortutako esparru hitzarmenetik ondorioztatzen den espazioen lagapena”.
Pasaiak “alkate erabakitsu bat” behar duela esan dute azkenik, “pasaitarrek merezi dituzten aukeretan irmoki sinesten duena eta borroka egiten duena aukera horiek gauzatzeko. Espero dugu alkate honek beste batzuei errua botatzeko tentaziorik ez izatea, gaiak ez bultzatzeagatik. Hainbat forotan jaso dugun bezala, Pasaiako sozialistak prest gaude elkarrizketarako eta adostasunerako, pasaitar guztien onurarako bada, eta ez soilik herritarren alde, baina “gurditik” tira behar duena ez da oposizioa, alkateak egin behar du”.
