Pirritx, Porrotx eta Marimotots ikusteko sarrerak, larunbatean salgai
Urtero bezala, Ugaldetxo Kultur Taldeak pailazoak gonbidatu ditu. Hilaren 21ean taularatuko dute 'Ez gara jaitsiko!' ikuskizuna.
Pirritx, Marimotots eta Porrotx Oiartzunera bueltatuko dira hilaren 21ean [Arg.: katxiporreta.eus]. Ugaldetxo Kultur Taldeak urteroko tradizioari jarraituko dio 2024an ere. Pirritx, Porrotx eta Marimotots pailazoak gonbidatuko ditu hilaren 21ean ikuskizuna eman dezaten.
Datorren asteko igandean Ez gara jaitsiko! emanaldia eskainiko dute, Elorsoro kiroldegian. 17:00etan hasiko da, eta ordubete eta hamar minutuko iraupena izango du.
Sarrerak datorren larunbatean —hilak 13— jarriko dituzte salgai, kiroldegiko leihatilan. 17:00etatik 19:00etara bitartean egongo da irekita. Txartelak 8 euroan salduko dituzte, eta pertsona bakoitzak, gehienez, zortzi sarrera eraman ahal izango dituela jakinarazi dute antolatzaileek.
Ez gara jaitsiko!
Honakoa da ikuskizunaren premisa: “Marimotots zuhaitz baten adaburura igo da, han goitik lurra hobeto ikusteko. Pirritxek eta Porrotxek atzetik jarraituko diote. Eta zuhaitzez zuhaitz eta adarrez adar, espero gabeko lekuetara helduko dira.”
