'Kuestaziyo'-etarako motorrak berotzen hasi dira
Ihoteetako bazkarian izena emateko aukera dago Karrikan. Ugaldetxo auzokoan txartel guztiak ziztu bizian agortu dira.
Hilabete inguru falta da ihoteak irits daitezen, eta Oiartzungo auzoetan hasi dira festa egun horiek antolatzen.
Karrikaren kasuan, kuestaziyua prestatzen hasi dira. Datorren ostiral arratsaldean —hilak 12— jarriko dituzte salgai txartelak, Artaso elkartean, 19:00etatik aurrera. Bazkariak 10 euroko kostua izango du, eta menuaren berri eman dute: zopa, haragia saltsan, postrea, kafea eta kopa.
Pertsona bakoitzak sei tiket hartu ahal izango ditu gehienez; 125 jarriko dituzte salgai. Jakinarazi dutenez, ardurak banatuko dituzte, eta txartelak hartu ondoren esango diete zer hartu beharko duten.
Ugaldetxon etxeko lanak eginda dituzte. Atzo jakinarazi zuten bazkarian izena emateko epea hasi zela, eta gaur bertan agortu dira sarrera guztiak. 09:00etan gelditu dira Gariñon, eta Ordo-zelai sagardotegian bazkalduko dute gero.
Beste auzoetako kuestazioen berri emango dute datozen egunetan. Instagram kontuan puntualki informatzen ari dira.
