San Juan baleontzian aurkitutako ehundegia erabiltzen ikasiko dute haurrek
Tailer berezia eskainiko diete 8-12 urte bitarteko haurrei datorren hilaren 21ean. Partaide bakoitzak 12 euro ordaindu beharko ditu.
Albaola faktoriak tailer berezi bat antolatu du datorren hilaren 21erako (igandea da). Egin zure bufanda XVI. mendeko eskuko ehundegian izena jarri diote hilaren 21ekoari. Izan ere, faktorian bertan berpizten ari diren San Juan baleontzian ehundegi batekin egin zuten topo adituek, eta aurkikuntza horri lotuta, ehundegi hori erabiltzen ikasteaz gainera, partaide bakoitzak bere bufanda egingo du. “Lan honek berebiziko garrantzia zuen itsasoan, belak zulatzen zirenean konpondu ahal izateko. Ehundegi hori erabiltzen ikasiko dugu, eta haur bakoitzak bere bufanda egingo du etxera eraman ahal izateko”, diote faktoriako iturriek.
10:30ean hasiko dute tailerra eta 12:00ak arte luzatuko dute. 8-12 urte bitarteko haurrek ahalko dute parte hartu. Bakoitzak 12 euro ordaindu beharko ditu. Izena emateko helbide honetara idatzi edo 943 39 24 26 telefono zenbakira deitu beharko da.
