Sareren manifestaziora joateko autobusa antolatu dute
Datorren larunbatean 'Konponbiderako giltzak' lelopean egingo da manifestazioa Bilbon. Autobuserako izena eman daiteke, ostiral arte.
'Konponbiderako giltzak' leloa izango du manifestazioak. Sarek manifestaziora deitu du datorren larunbaterako. Bilbon izango da, eta Casillatik aterako da, 16:00etan. Ordubete aurreratu dute, hiriburu berean Athletic eta Realaren arteko partida jokatuko baitutelako.
Edozein kasutan, Oiartzungo Sarek autobusa antolatu du bertara joateko. Txartelak 10 euroan eros daitezkeela jakinarazi dute, Kastro tabernan zein Garmendi txokolategian. Adierazi dutenez, ostirala izango da txartela eskuratzeko azkeneko eguna.
Autobusa ikastolako aparkalekutik aterako da. Manifestazioaren ordutegia aurreratu denez, irteera-ordua ezohikoa izango da: 14:00etan abiatuko dira Oiartzundik.
Mobilizazioaren leloa Konponbiderako giltzak izango da. Sarek manifestazioaren helburuak zehaztu ditu: “Helburua da milaka pertsonak giltzak hartzea beren eskuetan, presoen etxerako bidea, konponbidea eta bizikidetza irekiko dituzten giltzak”.
