Martxoaren 23ko gaua argituko du 23. Korrikak Pasaian
Gauez helduko da euskararen festa ibiltaria Pasaiara, 22:50ak inguruan izango dela aurreikusi du AEK-k. Antxotarrek hartuko dute lekukoa lehenik.
Martxoaren 23a festa egun luzea izango da Oarsoaldean, larunbatarekin eta gauez helduko baita 23. Korrika eskualdera. Pasaia izango da lasterkariek zapalduko duten eskualdeko lehen udalerria. Buenavistatik iritsiko dira herrira, antxotarrek hartuko dute lekukoa lehenik. AEK-k aurreikusitako ordutegiari erreparatuz, 22:50ak inguruan sartuko da 23. Korrika Antxora. Barrutia zeharkatu ondoren Trintxerpe eta San Pedrorako bidea hartuko du euskararen festa erraldoiak. Portura iristean une magiko batez gozatzeko aukera izango dute beste behin pasaitarrek: ontziz pasako baita lekukoa Pasai Donibanera. Bertatik Lezora joango da Korrika, 23:33ak inguruan sartuko dela aurreikusi du AEK-k.
Korrikarekin lotutako egitasmoak antolatzeko batzordea egingo dute antxotarrek datorren asteartean (hilak 16) Antxoko Txirrita AEKren egoitzan (17:45). Trintxerpen, berriz, hilaren 25ean egingo dute (20:00) Terranova kaleko 3. lokalean. San Pedron eta Donibanen ere bilkurak egingo dituztela aurreratu dute, baina hitzorduak oraindik zehazteke dituztela. Horien berri izan bezain laster jakinaraziko du HITZAk.
