Udalak 75.000 euro bideratuko ditu kultur ekitaldiak antolatzeko
Iaz bideratu zuen partida baino %73 handiagoa izango da aurtengoa. Eskaerak egiteko epea irekita dagoela gogorarazi dute.
Oiartzungo Udalak jakinarazi duenez, 2024an 75.000 euro gordeko ditu kultur ekitaldien antolaketa laguntzeko. Erakundeak nabarmendu duenez, iazko partidarekin alderatuta, %73 handitu da herriko eragileei bideratuko zaien ekarpena.
Udalak esan duenez, Oiartzun “herri kulturzalea” izan dadin sustatzen jarraitu nahi dute. Jexux Olaziregi Kultura zinegotziak azaldu duenez, urtetik urtera handitu egin da eragileen proposamen kopurua. “Oiartzun herri bizia eta sortzailea den seinale da”, zehaztu du.
Hitzordu horiek “parte-hartze komunitarioa, sormena, arte-adierazpena eta oiartzuarron ongizatea sustatzeko ezinbestekoak” direla nabarmendu du zinegotziak.
Bere hitzetan, kultura da komunitate identitatearen “zutabeetako bat da”. Horregatik udalak erabaki du ekarpena handitzea, honako arrazoiengatik: “Kultur eskaintza handitzen jarraitu, kultur-sarea indartu eta eragileek oiartzuarrentzat antolatu nahi dituzte ekintzei bide emateko”.
Eskaera egiteko epea, martxan
2024an zehar Oiartzunen kultur ekitaldiak antolatzeko diru-laguntza eskatu nahi dutenek urtarrilean izango dute horretarako aukera.
Diru-laguntzen zenbatekoa eskatzaileek egindako proposamenaren arabera erabakiko dela jakinarazi du udalak. Hainbat irizpide kontuan hartuko dituzte: proposamenaren kalitatea, ikusle edo parte-hartzaile kopurua, emakumeen parte-hartzea sustatzeko aurreikusitako ekimenak edota bazterkeria arriskuan dauden kolektiboak erakartzeko egindako ahalegina, besteak beste.
Udaleko erregistro orokorrean edo egoitza elektronikoan aurkeztu beharko dira eskaerak. Deialdiaren oinarriak udalaren webgunean aurki daitezke, Iragarki Taulan.
