Palestinaren aldeko oihu isila margotu dute Landetxen
Herritar talde batek sustatu eta burututa, Gazako sarraskia salatzen duen murala egin dute. Nola gorpuztu den azaldu dute.
Igandean hamarnaka lagun elkartu ziren muralaren parean. Mundua aztoratzen ari da Palestinan azken hiru hilabeteetan gertatzen ari denarekin. Oiartzunen, orain, Landetxe eraikin berriko pareta batean islatu dute bertako egoera salatzen duen oihu isila.
Herritar talde baten ekimenez sortu zen ekintza hori egiteko ideia. Hainbat gairekin dute kezka, eta horietako bat da Palestinako egoerarena. «Bultzada» bat eman nahi zioten Palestinako gaiari, eta han «sionismoa» egiten ari den «sarraskia» salatu.
«Landetxek eman digun agertoki berri hori aprobetxatu nahi genuen; libre zegoen horma hori jantzi nahi genuen, eta —modu horretan— elkartasun keinu bat egitea Oiartzunen bertan, eta jendearen arreta erakarriz, kontzientziazioa piztea».
Udane Ansa artistak diseinatu zuen irudia, eta herritar talde horretako kideak aritu dira hura margotzen. «Gernika koadroaren elementu batzuk sartu zituen, eta eraikinaren geometriarekin zerikusia duten irudiak sortu ditu, kontsekuente izateko, marra zuzenekin eta abar», adierazi dute taldeko kideek.
Murala osatuta, pasa den igandean inauguratu zuten, ekitaldi batekin. Dozenaka lagun hurbildu ziren Landetxeko txokora, Yon Oñatibia kalera ematen duen ertzera. Asier Bergaretxeren bertso batzuekin hasi zuten ekitaldia, murala sustatu duen taldeko kide batek iniziatibaren nondik norakoak azaldu aurretik.
Boikota, Desinbertsioak eta Zigorrak taldearen ordezkari batek hartu zuen hitza segidan, Palestinaren egoeraren berri emateko. Gainera, Israelekin zerikusia duten produktuei boikot egitera deitu zuen. Produktu horietako batzuk bota zituzten sutara gero.
Igandeko ekitaldia bukatzeko, Martxa baten lehen notak kantatu zuten. Abestiaren letrarekin batera, Israelekin harremana duten produktuen zerrenda pasatu zuten, baita hainbat pegatina banatu ere. Palestinaren aldeko aldarriak lau haizetara oihukatu ondoren, talde argazkia atera zuten muralaren aurrean.
Igandeko ekitaldian 200 bat lagun elkartu ziren. «Aurrez antolatu ditugun ekitaldietara —beste gai batzuetakoa— jendea hurbildu izan da, baina oraingoan askoz gehiago. Ikusi dugu kezka dagoela, eta jendeak beso zabalik hartu duela ekintza bat egin beharra», jakinarazi dute.
Herritarrek eurek hormairudia gustuko izan dutela adierazi dute. Gainera, izan duen kostuari aurre egiteko ekarpen ekonomikoa egin dute oiartzuarrek. «Igandeko ekitaldian bertan egindako ekarpenekin, margoak, garabia eta gainontzekoak erabiltzeagatik ordaindu genuen kopuruaren erdia estaliko dugu».
Hainbat gai esku artean
2024a hasi berri denean, murala sustatu duen herritar taldeak Palestinaren gaia landu du, eta, zantzu guztien arabera, kezka horrekin jarraitu beharko dute. Badute zerbait esku artean, zehaztu gabekoa.
Herritar talde horrek hainbat esparru landu nahi ditu. «Beste gai batzuekin hitzaldiak antolatzea badugu buruan. Igandekoa agitazio eta propaganda ekintza izan zen batez ere, baina gure asmoa da herrian eztabaidagune bat sortzea. Oraingoz, Palestinako egoera salatzen duen oihu isila islatu dute Landetxen.
