Hibaikak irabazi du Gizon Gazteen kategorian batel txapelketaren lehen estropada
Eroso irabazi zuten errenteriarrek, bigarren ontziari zazpi segundoko aldea aterata. Infantiletan eta promesetan garaipenik ez zuten eskuratu, baina oso txukun aritu ziren Zarautzek antolatutako estropadan.
Hibaikako Gazte Mailako Gizonen ontzia. Argazkia: Liher Saiz Zarate Hasi da batel denboraldia. Zarautzek antolatuta, Orioko uretan jokatu zuten larunbat arratsaldean lehen jardunaldia. Hibaikak emaitza paregabea lortu zuen Gizonen Gazte Mailan, izan ere, lehen estropadaren irabazleak izan dira errenteriarrak. Ziabogan, Tolosaldeko ontziaren denbora bera markatu zuten errenteriarrek erlojupekoan, baina itzulia azkarrago egin eta zazpi segundoko aldea jarrita eroso irabazi zuten txapelketaren lehen proba. Lidergoa ezartzeko lanean gogor aritzeko asmoa argi utzi dute Hibaikakoek.
Haur Mailan ontzi bana atera zuen uretara Hibaikak. Mutilak bosgarren sailkatu ziren Oriotarrak nagusitu ziren txandan; neskak berriz, seigarren Tolosaldea nagusitu zen saioan, hamabost ontziren artean, eta zortzi puntu eskuratu.
Promesetan, mutilen ontzi bakarra aritu zen. San Pedrok irabazi zuen kategoria horretan lehen jardunaldia; Hibaikako eskifaiak 10. postua egin zuen eta 4 puntu ekarri etxera. Maila bereko nesketan, berriz, lau ontzi izan zituen lehian Hibaikak, eta Hibaika A izan zen horien artetik lanak azkarren egin zituenak, hamargarren postuan sailkatuta—22 ontzi aritu ziren lehian—. Hibaika B hamahirugarren sailkatu zen, Hibaika C hemeretzigarren. eta Hibaika D, hogeita batgarren.
Emakumeen Gazte mailan, Hibaikak zazpigarren egin zuen lehen jardunaldian, zortzi ontziren artean.
Hibaikaren ontzien gaineko informazioa guztia arraun elkarteak sortu duen Whatsapp kontuaren bidez jarraitu daiteke. Egin klik hemen.
Sailkapen osoa kontsultatzeko egin klik hemen.
