Olatzarrek ezin izan du apustua irabazi
Lezoko Olatzar Eraikuntzak-en izenean Iñaki Urrutia eta Ignazio Telleriak idi apustua jokatu zuten larunbatean Iñaki Oliedenen idien kontra. Lezoko idiek galdu egin zuten.
Olatzarreko idiak larunbatean lehian. Ihintza Elustondo / Urola Kostako Hitza
Iñaki Olidenen (Orio) eta Lezoko Olatzar Eraikuntzak-en idien arteko apustua izan zen atzo, larunbata, Azkoitiko Gurea pilotalekuan. Ipintza harria erabili zuten probarako, eta 3.000 euro izan ziren jokoan. Iñaki Urrutia eta Ignazio Telleria aritu ziren Olatzar Eraikuntzak-en izenean idiak gidatzen, eta Orioko Iñaki Oliden eta Galder Bolaño Iñaki Olidenen izenean. Oriokoaren idiek 48 plaza osatu zituzten, eta 46 plaza, zinta bat eta 1,60 metro, berriz, Olatzar Eraikuntzak-en idiek. Horrenbestez, Iñaki Olidenentzat izan zen txapela.
Ostiralean pisatu zituzten bi aldeen idiak. Idiek 1.140 kilo pisatu behar zuten, eta pisu horretatik aurrera, kiloko kilo eta erdiko gainkarga ezarri zieten animaliei. Olatzar Eraikuntzak-en idiek 109,5 kiloko gainkarga eraman zuten, eta Iñaki Olidenen idiek 60 kilokoa. Gipuzkoako Herri Kirol Federazioak kontrolatu zuen apustua, eta sekula aurrez plazaratu gabeak ziren animaliak.
