Ania Hernandez eta Jon Ander Olazabal garaile Mitxintxolan
Atzoko jokatu zen Itsas Mendi elkartearen Mitxintxolako Igoeraren hamahirugarren ekitaldia. 62 korrikalarik bukatu zuten proba.
Emakumeetan Ania Hernandez Gonzalez gasteiztarra eta gizonetan Jon Ander Olazabal Larrañaga hernaniarra izan ziren atzoko Mitxintxolako XIII. Igoeraren garaile. Osotara 62 izan ziren 3,4 kilometroko mendi lasterketa bukatu zuten kirolariak. Itsas Mendi elkarteak antolatutako probaren sariak Arrokaundietako Piraten Etxean eman zituzten. Oarsoaldeko eta Bidasoko herri lasterketen egutegian lehena izan zen Donibanekoa.
Dezenteko eguraldiarekin egin zen proba, tenperatura egokiarekin. Proba hasi aurretik dozenaka sanjuandar joan ziren plazatik Mitxintxolako gaineraino egindako martxan, hango helmugan korrikalari den-denak animatzera joateko. Itsas Mendik bere sare sozialetan lasterketaren hainbat irudi ezarri ditu. Egin klik hemen horiek ikusteko.
Proban ez zen errekorrik hautsi. Beraz, gizonetan markarik onena Ander Aramendi sanjuandarrena izaten jarraitzen du (16.37), eta emakumeetan Lurdes Oiartzabal lezoarrarena (19.57).
Jarraian, gizonen eta emakumeen podiumak.
Emakumeak
- 1. Ania Hernandez Gonzalez (Gasteiz) 21.40
- 2. Intza Mitxelena Ugalde (Oiartzun) 25.31
- 3. Maialen Arzelus Ubillos (Donostia) 26.16
Gizonak
- 1. Jon Ander Olazabal Larrañaga (Hernani) 17.13
- 2. Oier Etxeberria Zubimendi (Azpeitia) 17.29
- 3. Eñaut Lasaarte Tejada (Donostia) 17.44
