Gaur 44 urte Karlos Saldise Korta hil zutela
Hilketaren tokian, Aralar kalean, lore sorta eta xingola belzdun ikurrina jarri dituzte. Hilaren 26an omenduko dute.
1980ko urtarrilaren 16an hil zuten Karlos Saldise Korta, haren etxearen atarian, Aralar kalean. Gaur, ohikoa den bezala, lore sorta eta xingola beltza duen ikurrina jarri dute hilketaren tokian. Gau hotza zen duela 44 urteko hura, eta jertse baten bila abiatu zen etxera Saldise. Bi balarekin hil zuten. Hilketa bi talde parapolizialek hartu zuten bere gain, Batallon Vasco Españolek eta Grupos Armados Españoles GAEk hain zuzen ere, baina hiru hilabetera, ikerketa ofizialik egin gabe artxibatu zuten auzia.
Saldiseren memoria manten dadin, Sortuk omenaldia antolatu du hilaren 26rako (ostirala). 20:00etan preso, iheslari eta deportatuen aldeko kartelada egingo dute, eta ondoren ekingo diote aitortza ekitaldiari herriak bere omenez duen plazan, Karlos Saldise plazan.
