Trintxerpe-San Pedro eta Donibaneko ludoteketan izena eman daiteke jada
Bazkideak ez diren haurrek 2023-2024 ikasturtearen bigarren zatian parte hartzeko aukera izango dute. Antxoko ludotekan ez da izen ematerik zabaldu, plaza kopurua beteta baitago jada.
Donibane eta Trintxerpe-San Pedroko udal ludotekek 2023-2014 ikasturtearen bigarren zatirako dena prest dute, bazkideak ez diren haurrentzat izena emateko epea zabaldu berri dutela jakinarazi du Pasaiako Udalak. Otsailaren 1etik aurrera apunta daitezke 4-12 urte bitarteko haurrak.
Trintxerpe-San Pedroko kasuan, otsailaren 10era bitarte luzatuko dute izena emateko epea, udaleko iturrien arabera, “plaza berriak mugatuak direnez ikasturte hasieratik haur asko bazkideak baitira”. Dauden plazak baino gehiago baldin badira, bozketa egingo dute otsailaren 11n.
Donibaneko ludotekaren kasuan, urtero bezala, otsailean zehar izango dira izen emateak.
Antxokoan, berriz, ez da izen ematerik zabalduko, aurtengo ikasturtean 150 haur baino gehiago baitira jada: “ez da posible gaur egungo instalazioetan haur gehiago hartzea”, zehaztu dute udaleko iturriek.
4-12 urte bitarteko haurrei zuzendutako zerbitzua da ludotekek eskaintzen dutena, “haurrek topaketarako eta jolaserako leku bat izan dezaten”. Gainera, euskara landu eta gizarteratzea ere garatzen laguntzen diete haurrei. “Modu sortzailean garatzeko, lagun berriak egiteko, irudimena estimulatzeko eta partekatuz, jokoez arduratzeko aukera” emango diete haur partaideei.
Hiru zentroek ekainaren 1era bitarte izango dituzte zabalik ateak, astelehenetik ostiralera, 17:00etatik 20:00etara eta larunbatetan 11:00etatik 13:00etara.
Ikasturte erdi honetarako 28,66 euroko kuota ordaindu beharko dute gurasoek. Donibaneko bizilagunek 943 34 43 28 telefono zenbakira deitu beharko dute izen emateak egiteko, eta Trintxerpe eta San Pedrokoek, berriz, 943 39 25 10ra.
Informazio eta xehetasun gehiago, lotura honetan.
