Filosofiak Galderen Agoran egingo du oihartzun
Oi(h)artzun Filosofikoa zena Galderen Agora bilakatuko da. Hilaren 28an izango da lehenengo saioa, eta herriko sortzaileak bueltatu dira dinamikaren plazara.
Haurrak filosofatzen jarriko dira berriro Oiartzunen. Oi(h)artzun Filosofikoa dinamikak izen berria izango du: Galderen Agora. Mundua, ingurua edo norberaren burua ulertzea “zaila” egiten dela nabarmendu dute antolatzaileek, eta galderak maiz pilatzen direla.
Horregatik, Galderen Agoran galderak partekatu eta elkarrekin filosofatuko dute, pentsamendu “kritiko, sortzaile eta arretatsua” garatzeko. Saioak hilean behin izango dira, 17:00etatik 19:00etara eta bertan, gainera, hainbat arte diziplina ezagutzeko aukera izango dute. “Pentsamenduaren bidez sormena, eta sormenaren bidez pentsamendua elikatuko ditugu”, aurreratu dute.
Pandemiaren aurretik zuten usadioa berreskuratu, eta hainbat sortzaile gonbidatuko dituzte saioetara, guztiak herrikoak: Idoia Beratarbide, Ainara Lasa, Pello Añorga, Oier Guillan, Luix Mitxelena… Xabier Salaberriak gidatuko ditu saioak.
Horrez gain, herritar diren heinean, bertan parte hartzen dutenek herriaz hausnartu eta herrian parte hartzeko bideak jarriko dituzte. Oiartzungo elkarte, eragile edo politikariek esku artean dituzten gaiekin galderak egingo dituzte, “ahal den neurrian eragiteko asmoz”.
Abaraxkan, Hipatiaren lorategian eta Ehuntzen izango dira saioak, txandaka. Lehenengo saioa ludotekan izango da, hilaren 18an. Saio bakoitza sortzaile batekin eta gai baten inguruan izango da, eta sormen proposamenaren arabera espazioa zehaztuko dela jakinarazi dute. Izena emateko epea zabalik dago, hilaren 24ra arte. Taldea osatzeko gutxienez hamar gaztetxo eta gehienez hogei beharko dira.
Izena emateko, banatu duten esku-orriko datuak bete behar dira. Elizalde edota Haurtzaroko idazkaritzetan utz daiteke, edo Abaraxka ludotekan.
