Prekarietateak hiltzen duela salatu dute
Atzo Altzaten lanean zela hil zen beharginaren senide, lankide eta lagunei elkartasuna adierazi diete bildutakoek.
Altzateko eraikuntza lanetan izandako lan istripua salatu dute gaur arratsaldean. Herrigintzatik deitutako elkarretaratzean prekarietateak hiltzen duela salatu dute, eta elkartasun eta samina adierazi diete bildutakoek atzoko lan istripuan hil zen langilearen senide, lankide eta lagunei.
Patronala lehen lerroan jarri dute, izan ere, mobilizazioaren deitzaileek salatu dute ez duela obretako araudi berezitua betetzen,”uneoro fase bakoitza ikuskatu behar duten prebentzio teknikariak ez direla obran egon. Bereziki larria da altueretako lan edo prozesuetan kontrolik edo errekurtso prebentiborik ez egotea, araudiak eskatzen duen bezala”. Horrenbestez, onartezintzat jo dute beharrezkoak diren bitartekoak ez jartzea, “eraikuntza da istripu hilgarrien liderra. Agerikoa da Lan Ikuskaritzak, Osalanek eta gobernuek ez dituztela jarduera horiek kontrolatu nahi, praktikan patronalari ez zaio araudia betearazten, eta horren emaitza agerikoa da: bizitzarekin ordaintzen dugu”.
Eraikuntzan dauden lan baldintza “txarrak” salatu dituzte, halaber, “lanaldi luzeak, azpikontratazioa, autonomo faltsuak, prestakuntzarik eza, prebentzio baliabiderik eza…”. Atzo LAB sindikatuak zabaldutako prentsa oharrean egin bezala, gaurko elkarretaratzean bildu direnek ere prekarietatea esplotazio modu bat dela salatu dute, baita laneko heriotzak eragiten dituen arrisku faktorea ere.
Amaitzeko, astelehenean, hilak 22, LAB, ESK, Steilas, EHNE eta Hiru sindikatuek deitu duten elkarretaratzearekin bat egin dute, eta bertara deitu herritar eta eragileak: “langileon presiotik etorriko da gaitz honi bukaera emateko gakoa. Gure bizitza jokoan dago”.
