Lezoko Aiton Bordak batzarrera deitu ditu bazkideak
Otsailaren 10ean bost hizketagai izango dituzte herriko erretiratuen elkartekoek. Herrikide zerbitzua martxan dela oroitarazi dute.
Urteko ohiko batzarrera deitu ditu Aiton Bordak elkartekideak. Otsailaren 10erako egin dute deialdia, Aiton Bordan bertan, 17:00etan lehen deialdian eta 17:30ean bigarrenean. Bost aztergai izango dituzte esku artean bazkideek.
Lehenean, 2023ko batzarrean adostutakoak oroitaraziko dituzte, aktaren irakurketa bidez. Ondoren, 2023an egindako jarduera eta ekintzen zerrendari errepasoa emango diote. Hirugarren puntuan 2024ko aurrekontu proposamena aurkeztuko dute. Gero iritsiko da batzarreko unerik gorenetakoa: zuzendaritza batzorde berria hautatzeari ekingo diote. Azken puntua bazkideen galde-eskeena da.
Bestalde, egungo zuzendaritzakoek oroitarazi dute Herrikide zerbitzua martxan dela hilaren 15etik. Aiton Borda du egoitza 65 urtetik gorakoentzat bideratutako eguneko zaintza zerbitzuak. Menpekotasun arriskuan dauden edo menpekotasuna aitortuta duten lezoarrentzako zerbitzua da Herrikide, eta astelehenetan, asteazkenetan eta ostiraletan goizez (10:30-13:30) artatzen ditu lezoarrak.
Zerbitzuari buruzko informazio zabalagoa, esteka honetan klik egiten bada.
Herrikide martxan jarri delako, masaje zerbitzuan aldaketak izango direla jakinarazi dute: astelehenetan 1400etatik aurrera, eta ostegunetan 09:00-13:00 tartean nahiz 15:00etatik aurrera emango dituzte.
