Lapurreta bat eragotzi dute antxotarrek
Lapurreta saiakera atzoko (astelehena) 18:30ak inguruan izan zen, Antxoko estanko batean. Gaur utzi dute epailearen esku ustezko lapurra.
Atzo, astelehena, antxotarrek barrutiko estanko batean lapurreta bat eragotzi zuten. 18:30ak inguruan izan zen gertakaria. Eusko Jaurlaritzako Segurtasun Sailaren arabera, deia jaso zuen Ertzaintzak Antxoko estanko batean lapurtzen ari zirela jakinarazteko. Agenteak hara iritsi, eta ikusi zuten hainbat herritarrek atxikita zutela ustezko lapurra: “Pertsona batzuek helduta zuten gizon batek arma zuri bat bota zuen lurrera”. Ertzaintzaren arabera, zortzi zentimetroko orria zuen labana zen zorura jaurtitakoa. “Bertan zeuden pertsonek agenteei jakinarazi zieten aipatutako establezimenduan lapurreta egiten saiatu berri zela gizon hori”, zehaztu dute Segurtasun Sailetik.
Ondorenean, ertzainek estankoko langilearekin hitz egin —bakarrik zegoen establezimenduan gertakariaren unean—, eta hark berretsi zuen atxikitakoa izan zela lapurreta egiten saiatu zena, “labana batekin beldurtu zuen langilea dirua emateko eskatuz”. Poliziak esandakoaren arabera, une horretan establezimenduaren inguruan zeuden hainbat herritar atrako saiakera baten aurrean zeudela ikusi, eta atetik lapurrari aurre egin zioten. Hura lokaletik ihesean atera, baina herritar horiek atxiki zuten.
Arma zuriarekin lapurreta egitea leporatuta atxilotu zuten 31 urteko gizona, eta gaur bertan (asteartean) da pasatzekoa epailearen aurretik.
