%9,4koa da Pasaiako langabezia tasa
784 pertsona daude lanik gabe Pasaian, 446 emakume eta 338 gizon. 2022ko azken egunean 819 ziren langabeak, %9,8ko tasarekin.
2023ko abenduaren 31n, Pasaiako langabezia tasa %9,4koa zen. 2022ko azken egunarekin alderatuta hobetu egin da datu hori, orduko hartan %9,8koa zelako zifra hori. Oarsoaldeko herrien batez besteko tasa orokorra %8,9koa da: Errenteria-Oreretak du tasarik altuena (%9,5), Oiartzunek baxuena (%6,3) eta Lezorena %7,6koa da. Datu horiek eta beste asko Oarsoaldea Garapen Agentziak ditu bilduta bere webguneko Behatokia atalean.
Ehuneko horiek pertsonen kopurura eramanda, honakoak datuak: 784 langabe daude Pasaian, horietatik 338 emakumeak eta 446 gizonak; duela urtebete 819 ziren lanik gabekoak (363 gizon eta 456 emakume). Beraz, emakumeen langabezia tasa herrian %10,85ekoa da, gizonena %8,02koa den bitartean.
2012ko langabezia tasa %17,4koa zen Pasaian. Ia erdira jaitsi da
Azken hamarkadetako langabezia tasarik altuena 2012an izan zuen Pasaiak, %17,4koa zehazki. Orduko krisiaren gordinenean jaso zen datu hori: 1.306 pasaitar zeuden lanik gabe, hau da, egungoen bikoitza izatetik ez oso urrun.
Espainiako Gizarte Segurantzako Diruzaintza Orokorrean 3.392 pasaitarrek dute izena emanda, hau da, horiek dira laneko etekinengatik kontuak ematen dituztenak herrian. Horietatik %29,3 autonomoak dira. Oarsoaldeko beste herriekin alderatuta bereziki altua da autonomoen kopurua, eskualdeko batez besteko orokorra %18,8koa delako.
