Kontsumitzaileen erreleboa ezinbestekoa delako
Azken bonu kanpainaren balorazioa egin du udalak Errenteriako Merkatua, Ostari eta Errenkoaldeko ordezkariekin batera. Saltokien erreleboa bezain garrantzitsua dela kontsumitzaileen erreleboa esan du Aizpea Otaegi alkateak.
Ezkerretik eskuinera, Maika Martin, Mendeku Muñoz, Leire Mazizior, Maixabel Alfonso, eta Aizpea Otaegi. Tokiko ehun ekonomikoa indartzeko bosgarren bonu kanpaina abiatu zuen joan den urteko irailean Errenteriako Udalak sektoreko eragileekin elkarlanean. Bosgarren kanpaina horrek berezitasun bat izan du, gazteei begirakoa izan da, zehazki, 18-35 urte arteko herritarrei begira antolatu da, gazteen kontsumo ohituretan eragiteko asmoarekin.
Garrantzitsua da tokiko establezimenduek erreleboa bermatua izan dezaten, baina hori bezain garrantzitsua dela erosle edo kontsumitzaileen erreleboa lehen lerroan jarri du Aizpea Otaegi alkateak. Errenteriako Merkatua, Ostari, eta Errenkoalde elkarteak eta Leire Mazizior Garapen Ekonomikoko zinegotziarekin batera azken bonu kanpainaren balorazioa egiteko agerraldian adierazi du hori Otaegik, “gazteei begirako kanpaina egin izana horrekin lotuta dago. Izan ere, badago identifikatua herrian kontsumitzen dutenak adin tarte batetik gorakoak direla” Esperimentatzearen garrantzia aipatu du gainera, “probatu behar dugu ea zenbateraino garen gai gazte jendeak herrian kontsumitzeko ohitura har dezan, hori izan da helburua azken kanpaina honetan”.
Maziziorrek eman ditu bonu kanpainari lotutako datuak. Gazteen erosketa ohituren gaineko azterketa egin zuela udalak urte hasieran azaldu du eta ondorioztatu zutela eragin beharra zegoela kontsuma ohitura horietan: “Herriko komertzio, ostalaritza eta zerbitzuen ezagutza handia ez dutela eta kanpora jotzen dutela erostera ikusi genuen”. Kanpaina “arrakastatsua” izan dela esan du Maziziorrek. Udalak 350.000 euro bideratu ditu denera bonu kanpainara eta 18-35 urte arteko gazteei helarazitako bonu horien %63a erabili da —44.017—, “2022an lortutako erabilera kopuru antzekoa izan da azken kanpainakoa ere. Gazteak gure komertzioetan ikusi ditugu, eta erabilitako estrategiak funtzionatu egin du, beraz”.
Bonuak gehienbat dendetan erabili dira, “batez ere arropa dendetan eta harategietan”. Ostalaritzan aurreko kanpainekin alderatuta igoera izan du bonu erabilerak, %4 egin du gora, bereziki gastronomiara bideratutako negozioetan Maziziorrek azaldu duenez.
Igoera ere kanpainara atxiki diren saltokietan ere, “200ek hartu dute parte bosgarren kanpainan, aurreko ekitaldian baino 19 gehiago, eta hori ere positiboa da”.
Aurten bonu kanpaina martxan jarriko duela udalak baieztatu du Garapen Ekonomikoko zinegotziak, eta horretarako eragileekin elkarlanean ariko direla, orain arte bezala, estrategiak zehazteko.
Balorazio positiboa bertaratu diren eragileen aldetik ere. Ostariko Mendeku Muñozek tokiko merkataritza dinamizatzeko ekintza oro positibotzat jo du, “hasieratik izan zuen bonu kanpainak harrera paregabea, oso iniziatiba interesgarria da”. Bide beretik jo du Maixabel Alfonso Errenteriako Merkatua Elkarteko kideak, “merkataritzari on egiten diote kanpaina hauek zalantzarik gabe, tokiko ekonomiari eragiten dio. 30-35 urte arteko jendea ikusi dugu batez ere gure kasuan merkatuan”.
Bonuen erabilerraztasuna nabarmen jarri du Errenkoaldeko presidente Maika Martinek, “arropa erosteko, okindegian, elikagai dendetan erabiltzea duzu. Gazteei begira egitea kanpaina, egindako lan bati erantzuten dio. Interesgarria iruditu zitzaigun lehentasuna ematea gazteei. Finean, beraiek dira, gazteak, une honetan zailtasun gehien dituztenak dirua eskura izan eta kontsumitu ahal izateko”.
Gazte jendeak herrian, tokiko establezimenduetan erosteko ohitura hartzeari garrantzia eman dio Otaegik, eta hori behar duela izan helburua gaineratu, “gazteak kontsumitzen ikusi ditugu, baita gazte horien familiak bonuak erabiltzen ere, eta hori ondo dago, izan ere bonuak nominalak ez izateak hori ahalbidetu duelako. Aldi berean esanguratsua da gazte batek herrian bonu horiek non erabili ez identifikatzea edo ez baliatzea; horrek ere zerbait esaten digu, eta hor eragin behar dugu hain justu ere. gauza berriak esperimentatzen jarraitu behar dugu etorkizuna izan nahi badugu herri gisa eta merkataritza eta ostalaritza bizi bat nahi badugu ezinbestekoa da gazteek herrian kontsumitzea”.
