Hildako bat Gaintxurizketan bi autoen arteko istripuaren ondorioz
Gizon bat hil da bi autok aurrez aurre egin eta gero. Beste gizon bat zauritu da istripu berean.
Gaintxurizketako artxiboko irudi bat. Gizon bat hil da Gaintxurizketan —Lezo— gaur goizean bi autoen artean izandako istripuan. Beste gizon bat, zauritu da istripu berean. Goizeko lehen orduan izan da ezbeharra Gi-636 errepidean. Bi autok aurrez aurre egin dute talka 08:00ak inguruan, eta autoetako bateko gidaria hil egin da talkaren une berean, Eusko Jaurlaritzaren Segurtasun Sailak jakinarazi duenaren arabera.
Istripuan inplikatutako beste ibilgailuko gidaria ere zauritu da, eta suhiltzaileek atera behar izan dute autotik. Ondoren Donostia ospitalera eraman dute.
Istripuaren ondorioz, erabat moztu dute errepide hori eta auto-ilara handiak eragin ditu. Istripuaren nondik norakoak argitzeko ikerketa abiatu du Ertzaintzak.
