Palestinaren alde manifestaziora deitu du Orereta Palestinarekin Herri dinamikak
Otsailaren 17an izango da manifestazioa, 17:00etan. Horri begira, Errenteria-Oreretako zein Oarsoaldeko elkarte eta eragileen atxikimendua biltzen hasi da dinamika.
Manifestazio jendetsua joan den urriaren 20an Palestinaren alde Orereta Palestinarekin Herri dinamikak deituta. Mobilizazio handia egin nahi dute, ahalik eta jendetsuena, eta horri begira lanean hasi da Orereta Palestinarekin Herri dinamika. Otsailaren 17an manifestaziora deitu du dinamikak, 17:00etan. Horri begira, gainera, atxikimendu kanpaina abiatu berri du Errenteria-Oreretako zein Oarsoaldeko gainontzeko herrietako elkarte, eragile eta norbanakoen atxikimendua jasotzeko.
Gogora ekarri du, lau hilabete beteko direla, “Estatu sionistak Palestinako herriaren aurkako inoizko erasorik bortitzena” abiatu zuenetik, eta aurretik, hamarkada luzeetan jasan izan behar dituela hamaika eraso, “lurraren lapurreta, derrigortutako desplazamendua, okupazioa, apartheida, sarraski eta atxiloketak… Finean, Palestina eta palestinarrak desagerraraztea da estatu sionistaren helburu behinena, eta azken hilabeteetakoa genozidioa da edozeinen begietara”.
Egoeraren aurrean, Palestinako herriari elkartasuna adierazi eta pairatzen ari den sarraskia salatzea dutela helburu gaineratu du herri dinamikak. Hiru hilabete pasa da dinamika martxan jarri zutela egoerarekin kezka zuten hainbat herritarrek, eta ordutik, hainbat ekintza antolatu dituzte: “Elkarretaratzeak, Palestinako banderen banaketa, kotxe karabanak, hitzaldiak, eta udalean mozioa ere aurkeztu genuen“. EH Bilduk eta Elkarrekin Errenteriak babestu zuten mozio hori, eta PSE-EEk, EAJk eta PPk kontra egin zuten.
Datuak ere eman ditu dinamikak atxikimenduak jasotzeko prestatu duen idatzian: 25.000tik gora palestinar hil ditu Israelek pasa den urriaz geroztik; horietatik 10.000 haur eta nerabeak.
Otsailaren 17ko manifestazioa Herriko Plazatik abiatuko da, Erresistentziaz Palestina askatu leloarekin 17:00etan. Hura iragartzeko, agerraldi jendetsua iragarri du Orereta Palestinarekin taldeak. Otsailaren 12an izango da, astelehenarekin, 19:00etan Herriko Plazan.
Atxikimendurako agiria hemen klik eginda deskarga daiteke. Online ere egin atxikimendua egin dezakete interesdunek. Egin klik hemen horretarako.
