Agustina Linazosoro Arriolak, 100 urte
Altza auzoko Maritxalar etxean jaioa 1924an, 13 urterekin utzi behar izan zuen bere etxea eta jaioterria 1937ko maiatzaren 21ean.
Agustina Linazosoro Arriolak 100 urte bete ditu. Agustina Linazosoro Arriolak 100 urte bete ditu gaur. Hamaika bizipen daramatza soinean. Altza auzoko Maritxalar etxean jaioa 1924an, 13 urterekin utzi behar izan zuen bere etxea eta jaioterria 1937ko maiatzaren 21ean. Bere anai-arrebekin, eta beste 3.861 haurrekin batera, Habana izeneko itsasontzian heldu ziren Southamptonera. Paper garrantzitsua izan zuen ontzi horrek 1936ko Gerran euskal errefuxiatuen eta batez ere gerrako haurren ebakuazioan.
Handik hiru urtera Itzuli zen Euskal herrira, Errenteriara zehazki, Zumardian kokatutako liho fabrikan lanean hasteko. Bertan ezagutu zuen senarra izango zuena, Manuel Arozamena, LA Estrata aldapan zegoen Villareal okindegiko langilea.
Hiru seme-alaba izan zituzten: Lourdes, Manuel eta Patxi. Lehena, tamalez, difteriak jota hil zen lau urterekin. Handik denbora batera, janari denda alokatu zuten Agustinak auzoko Markola hiribidean, eta han aritu ziren 46 urtez lanean, erretiroa hartu arte.
Lau bilobekin pozez gozatzen jarraitzen du Linazosorok. Zorionak Agustina!
