Udal barruan euskararen erabilerari hauspoa emateko pausoak Lezon
Lezoko Udaleko Euskararen Normalizaziorako VII. Plana osatzeari ekin diote udalean. Langileekin lehen batzarra egin dute.
Lezoko Udalak, udal barruan Euskararen Erabilera Normalizatzeko VII. Planaren prozesua aktibatu du. Horren arabera, udal langileekin aste honetan batzarra egin dute iniziatibaren berri emateko. Aldi berean, Udalerri Euskaldunen Mankomunitateak (UEMA) Lezorako izendatu duen teknikariak erakundearen beraren, hizkuntza politiketan eragiten duen lanaren, eta udalerri euskaldunen errealitatea sakonago ezagutzeko egiten duen lanaren berri eman zuen. Gainera, udalei eskaintzen dizkieten zerbitzu eta proiektuak ere azaldu ziten UEMAko kideak.
Iker Salaberria Euskara zinegotziak prozesuaren gaineko xehetasunak eman ditu. Hala, hasiera bilkura horren ondotik udal barruko diagnostikoarekin hasiko direla aurreratu du, “horrela gaur egungo hizkuntza erabileraren eta kudeaketaren argazki zehatza osatzeko”. Handik ateratako ondorioekin udal barruan euskararen erabilera normalizatzeko plan estrategikoa osatuko dute, “bai eta unean-unean erabili beharreko hizkuntza arautuko duen hizkuntza irizpideen dokumentua ere”.
Prozesuaren azken helburua zehaztu du udalak: zerbitzu hizkuntza eta lan hizkuntza euskara izatea, betiere herritar guztien hizkuntza eskubideak errespetatuz.
Udal barruan bakarrik ez. Herrira begirako euskararen normalizaziorako prozesu parte hartzailea abiatzeko asmoa du udal erakundeak.
