Kontxa Murgia oroitu eta omendu dute gaur oiartzuarrek
Euskal Herria eta Galizia modu berezian lotu dira gaur Oiartzunen. Daniel Castelao Galiziako abertzaletasunaren bultzatzaile izan zenaren ama Kontxa Murgia Egañari omenaldi berezia egin diote.
Beste urte batez, 24.enez jarraian, Euskal Herria eta Galizia modu berezian lotu dira Oiartzunen. Atzo, Fato Cultural Daniel Castelaok eta Oiartzungo Udalak elkarlanean antolatuta, poesia errezitaldia egin zuten, euskaraz zein galegoz. Gaur, ordea, Daniel Castelao Galiziako abertzaletasunaren bultzatzaile izan zenaren ama Kontxa Murgia Egañari omenaldi berezia egin diote oiartzuarrek. Manuel Lekuona bibliotekan izan da ekitaldia, solasaldia eta lore sorta eskaintza egin dute, Murgiaren omenezko plakan.
Txistulari eta gaiteroen doinuek girotu dute gaurko omenaldia. Garazi Urdanpilletak hartu du hitza udalaren izenean. “Bere oroimena ekarri nahi dugu gaurkoan. Etxe honetan jaio zen. Bere omenezko plaka hau hemen dugu erroak Euskal Herrian daudelako eta erro horiek Galizian loratu zirelako”, esan du. Gero, Murgiaren historia gogorarazi du Urdanpilletak.
1806ko urtarrilaren 29an jaio zen Murgia, Oiartzunen, eta 1854ko uztailaren 13an hil zen, Santiago de Compostelan (Galizia), 48 urterekin. Oiartzungo San Esteban elizako organo jotzaile postua lortu zuen haren aita Domingo Murgiak 1979an, eta etxea eta baratza eman zizkioten gaur egungo bibliotekan. Handik bederatzi urtera jaio zen bertan Murgia. Bederatzi urterekin Tolosara joan zen familia eta urte batzuk geroago Galiziara egin behar izan zuten ihes. Han geratu zen Murgia, ezkondu eta bi seme izan zituen. Semeetako bat, Manuel Martinez Murgia hain zuzen, galiziar berpizkundeko pertsonaia handienetako bat izan zen, eta Rosalia de Castrorekin ezkondu zen.
