Langile bat hil da Pasaiako portuan
Atzo iluntzean izan zen ezbeharra. Noatum UECC konpainiaren instalazioetan izan zen.
Karga maniobra bat egiten ari zenean izan da ezbeharra. Hilabete iluna izaten ari da urtarrila. Langile baten heriotza eragiten duen urteko bigarren lan istripua izan da eskualdean, oraingo honetan Pasaiako portuan. Iluntzean izan zen ezbeharra, segurtasunaz arduratzen zen 47 urteko langile bat zendu zen arratsaldean Noatum UECC konpainiaren instalazioetan, karga maniobra bat egin ari zenean. Zamalanak egiten ari zen kamioi batek zaintzaile bat harrapatu eta hil egin zuen. Gertatutakoa ikertzen ari da Guardia Zibila.
Teo Alberro Pasaiako alkateak doluminak bidali dizkie haren senide eta gertukoei, sare sozialen bidez: “Nire doluminik zintzoena gaur arratsaldean zendu den langilearen familiari eta gertukoei. Azkena izan dadila”.
LAB sindikatuak jakinarazi duenez, istripua gertatu bezain laster LABen delegatuek jarduna eten eta langileak etxera bidali zituzten, eta gaurko jarduna ere etetea erabaki dutela . Bihar, berriz, elkarretaratzea egingo dute portuaren barnealdean: “Istripu maila izugarri honen aurrean neurriak hartzea eskatzen dugu, patronalaren inpunitatearekin amaitu behar da. Horretarako, instituzioek erabaki politikoa hartu behar dute, behingoz, ia hiru hamarkada abian daraman lan osasuneko araudia betearazteko. Bete ezean, langile klasea hiltzen jarraituko dute”, salatu dute, hedabideei bidalitako ohar batean.
