Gizon bat atxilotu dute etxebizitza batean lapurreta egiten saiatzea egotzita
Goizaldean atxilotu dute, etxe jabeak etxe barruan harrapatuta ihes egin eta gero.
Ertzainek atxilotu dute gizona gaur goizaldean. Gizon bat atxilotu du Ertzaintzak gaur goizaldean Errenteria-Oreretako etxebizitza batean lapurtzen saiatzea egotzita. Goizaldeko hirurak aldera izan da lapurreta saiakera Galtzaraborda auzoko etxebizitza batean Eusko Jaurlaritzaren Segurtasun Sailak prentsa ohar bidez jakinarazi duenez. Etxeko jabea esnatu zuen zaratak, eta ezezagun bat harrapatu zuen etxeko komunean. Lapurrak etxetik ihes egin zuen linterna eta motxila zeramatzala.
Ertzaintzari ohartarazi eta bertaratu direnean, susmagarria inguruan harrapatu dute hesi baten atzean ezkutatzen saiatzen ari zela; motxila eta linterna zeramatzan besteak beste, eta ertzainek atxilotu egin dute.
Atxilotutakoak 21 urte ditu eta Segurtasun Sailaren arabera, polizia aurrekari ugari. Ertzain etxera eraman dute diligentziak egiteko. Horiek amaituta, epailearenera eramango dute datozen orduetan.
