BTTan Jaizkibelen jolasean
90 gazte bildu ziren atzo Lezo BTT Gaztea martxetan. OTXE oso pozik azaldu da lehenengoz egin den kirol iniziatibarekin.
“Lezo BTT Gaztea esperientzia ikaragarria izan da”. Hala izendatu du Oarsoaldeko Txirrindularitza Kirol Elkarteak (OTXE) atzo Lezon bizi izandakoa. Izan ere, lehenengoz Lezo BTT Gaztea martxak egin zituzten, gazteek txirrindularitza modalitate horrekin hartu-emana izan zezaten. 90 parte hartzaile bildu ziren Jaizkibeldik zehar ibilbide luzea (Saldise plaza-Guadalupe-Saldise plaza) eta motza (Saldise plaza-Donibaneko Alabortza-Saldise plaza) egiteko, betiere OTXEko txirrindularien esanetara. “Oso pozik gaude egindakoaz”, OTXEkoak baikor.
Lezokoak merkataritza, ostalaritza eta zerbitzu elkartekoekin elkarlanean antolatu zuten atzoko jardunaldia eskualdeko bizikletaren zaleek. Lezoko Udalaren laguntza izan zuen ekintzak. Hala, Lezokoak-ekoei esker, behin martxak bukatuta, txokolate beroarekin eta baratxuri zoparekin indarberritzeko aukera izan zuten BTT kirolari gazteek, eta gainera, hainbat zozketa izan zituzten. “Pozik joan ziren etxera partaideak. Ezbeharrik gabe, eta errepikatzeko asmoz. Hurrengo urtera arte”, ebatzi dute OTXEkoek.
Jarraian eguneko hainbat irudi, OTXEk HITZAra bidalitakoak.