Bi inputatu, Pasaian eta Donostian hainbat autotan lapurreta egiteagatik
Zazpi autotan lapurtzea egotzi diete bi gizonei. Trintxerpeko Azkuene kalean eta Donostiako Bidebietako Juan Carlos Gerra kalean egin zituzten lapurretak.
Irudia: Google Maps. Pasaiako Udaltzaingoak jakinarazi berri duenez, joan den ostegunean (hilak 25) 28 eta 19 urteko bi gizon inputatu zituzten, Pasai Trintxerpeko Azkuene kalean eta Donostiako Bidebietako Juan Carlos Gerra kalean aparkatutako hainbat ibilgailutan lapurtzeagatik.
Gauez atzeman zituzten bi gizonak, 2:25ak aldera. Ertzaintzak herritar baten abisua jaso zuen, bi lagun “jarrera susmagarrian” ikusi zituela esanez. Ibilgailu batetik ateratzen ikusi zituen, udaleko iturrien arabera, “hainbat gauza zituela eta ibilgailuak leihatila bat hautsita zuela”.
Udaltzainek ingurua ikuskatu eta Ertzaina abisatu zuten. Bidebietan (Donostia) aurkitu zituzten bi gizonak, herritarrak emandako deskribapenarekin bat zetozelako. Identifikatu eta miatu egin zituzten. Handik metro gutxira lorategi batean ezkutaturik “jatorri zalantzagarriko zenbait objektu” aurkitu zituzten agenteek, horiek konfiskatuz. Ingurua aztertu ondoren, kristala apurtuta zuten zazpi ibilgailu aurkitu zituzten, horietako bi Pasaiako Azkuene kalean.
Bi gizonei indarrezko lapurreta delitua egotzi diete eta konfiskatutako objektuak jabeei itzuli dizkiete.
