Korrikarekin lotutako bi emanaldi, otsailean
'Badon' opera posdramatikoa ikusteko aukera izango da hilaren 25ean. Hilarne 29rako, 'Bizkarsoro'-ren emanaldia antolatu dute. Sarrerak, salgai.
'Badon'-en irudi bat. Bi hilabete baino gutxixeago falta da Korrika Oiartzundik pasa dadin, baina aurretik hainbat ekitaldi prestatu dituzte. Oiartzungo Korrika Batzordeak bi zita programatu ditu otsailerako.
Lehenengoa hilaren 25ean izango da, igandearekin. Badon “opera posdramatikoa” taularatuko dute Landetxen, 19:00etan hasita. Sarrerak 8 euroan daude salgai.
Euskal kultura eta haren kanonak berrikusten ditu Badon-ek. Egungo euskal kulturako hainbat erreferentek hartu dute parte haren sorkuntzan: Ines Osinagak, Uxue Alberdik, Eneritz Furyakek, Maite Arroitajauregik…
Aktore lanetan Osinaga bera, Ainara Gurrutxaga, Oihana Vesga, Xanti Agirrezabala eta Marina Suarez aritzen dira.
Horrela azaldu dute Korrika Kulturalaren barruan estreinatuko duten proposamen artistikoa: “Jolasaren bitartez, etorkizun utopiko espekulatibo bat proposatzen du. Eszena sorkuntza honek esperientzia estetiko eta zentzumen bidezkol bat dakarkio publikoari, denok partekatzen dugun iruditeriatik sortutako mundu posible bat”.
“Bestelako kanona, plaza publikoa eta aitortza praktikan jartzea” da ikuskizunaren helburuetako bat. Opera izan arren, ez du genero musiko-eszeniko horren ohiko formaturik. Behean —lehenengo bideoan— ikus daiteke entresaka bat.
Bizkarsoro, azken egunean
2024 hau bisurtea da, eta otsailaren 29ko egun berezian, beste emanaldi berezi bat proiektatzea antolatu du Korrika Batzordeak.
Josu Martinezen Bizkarsoro filma emango dute Landetxen, 19:30ean hasita. Bizkarsoro fikziozko herria da, Ipar Euskal Herrikoa. Errealitatean oinarritutako istorioa kontatzen du. Bizkarsoron Lehen Mundu Gerran Frantziaren bandoan borrokatu behar izan zuten, eta Bigarrenean, nazien okupazioaren pean geratu ziren.
Beraien identitate eta hizkuntzari uko egin behar izan zioten. “Programaturik dago bere heriotza, arriskuan dago, eta ondo pentsaturik egingo zaio eraso, baina pronostiko guztien kontrara, eutsi egingo dio. Eta hiltzekotan ere, badaki, autopsiarako frogak utzita hilko dela”. Filmaren teaserra ikus daiteke Badon-enaren azpian.
