Alabergan kanpatuta geldituko dira aurten Kaldereroak
Karroak tiratzen zituzten asto eta zaldiak ateratzeko baimenik ez dute jaso, eta desfilea bertan behera utzita, auzoan muntatuko dute kanpalekua.
Arditurri auzo elkarteko kideak atzoko agerraldian. Argazkia: Arditurri Agerraldia egin zuten atzo arratsaldean Arditurri Auzo Elkarteko ordezkariek. Astakeriarik? Ez eskerrik asko pankarta atzean zutela hartu zuten hitza auzo elkarteko eta kaldereroen konpartsaren antolatzaileetako batzuk. Sei hamarkada daramala Kaldereroen konpartsa antolatzen elkarte horrek esan zuten lehenik, “urtero herriko kaleak alaitzen eta zartaginak astinduz”. Aurten, baina, ez dutela desfile hori egingo jakinarazi zuten, ez behintzat herriko kaleetan barrena. Konpartsak ateratzen dituen gurdiak astoek eta zaldiek tiratzen dituzte, eta Kultura departamentuak ez diela aurten horretarako baimenik eman azaldu zuten atzo egindako prentsaurrekoan: “Urtero bezala ateratzea eskatu badugu ere, ez dugu Kultura sailaren baimenik jaso. Hori horrela, irtenbide bat aurkitu bitartean, Alabergako kaldereroen konpartsa auzoan geldituko da”.
Desfilearen ordez, Alabergako plazan jarriko dute kanpalekua kaldereroek, eta desfilean zehar abestu eta dantzatu ohi dituztenak plazan egingo dituzte, inauteriari ongi etorria emateko.
Ohikoa duten baratxuri zopa, eta aurten, berritasun gisa, parrilan egindako pintxoak banatuko dituzte bertaratzen direnen artean. Hartzak ere ez du hutsik egingo, eta haurrekin argazkiak egiteko prest izango dela jakinarazi dute Arditurriko kideek.
Bukatzeko, herritar guztiak deitu dituzte Alabergako plazara gertura daitezen, “gurekin batera arratsalde atsegin bat pasatzera gonbidatu nahi ditugu herritar guztiak”.
Hitzordua, larunbatean, 19:00etan.
