Marrazki bizidunez ospatuko ditu inauteriak Piztu Lezok
Gazte taldeak Larunbat Gorrirako (hilak 10) programatu ditu inauterien bueltako jarduerak. Karropoteoa, argazki erraldoia eta aurkezpena, afari herrikoia eta elektrotxaranga bat dira proposamenak.
2023ko inauteriak. Argazkia: Piztu Lezo. Inauteriak ate joka dira, eta ekitaldi mordoarekin lurreratuko dira Lezon. Trapujale Taldeak antolatuta, Ostegun Zurian (hilak 8) jarriko dira martxan lezoarrak, Trapujaleren jaitsierarekin. Hortik aurrera, hainbat jardueraz osatutako programazioa ondu dute festez gozatzeko. Inauterien bueltako jarduerak hilaren 13an itxiko dira, Trapujaleren epaiketarekin.
Piztu Lezok ere inauterietarako antolatu duen programazioa argitaratu du. Gazte taldeak Larunbat Gorrirako (hilak 10) programatu ditu jarduerak, marrazki bizidunen gaia ardatz. 18:30ean karropoteoa egingo dute Karlos Saldise plazatik abiatuta. 20:15ean argazki erraldoia atera eta aurkezpena egingo dute Herriko plazan. 21:00etan, aldiz, afari herrikoia egingo dute Koldobide Gezala frontoian, eta eguna bukatzeko, Matraka elektrotxarangak herriko kaleak girotuko ditu 23:30etik aurrera. Piztu Lezokoek, gainera, edalontzia etxetik eramatea eskatu dute.
Piztu Lezoren Inauterietako programazioa
- 18:30: Karropoteoa, Karlos Saldise plazatik.
- 20:15: Argazki erraldoia eta aurkezpena, Herriko plazan.
- 21:00: Afaria, Koldobike Gezala frontoian.
- 23:30: Matraka elektrotxaranga.
