Illunbeko beteranoak eta San Juanen gizonen bi ontziak, Sestaora
Kaikuk antolatutako jaitsieran parte hartuko dute Pasaiako hiru ontzi horiek. Joan den asteburuan San Pedro Portugaleten izan zen.
Trintxerpeko beteranoak, iazko argazkian. Igandean, eta Sestaoko Kaiku Arraun Elkarteak antolatuta, Julian Enrike XV. Jaitsiera egingo dute Nerbioi ibaiaren bokalean. Pasaiako hiru ontzik parte hartuko dute bertan: Trintxerpe-Illunberen Beteranoen Mailako ontziak, eta San Juanen gizon seniorren biek (A eta B) parte hartuko dute. Horiekin batera Hondarribiko emakumeen ontzia, nahiz senior gizonen biak ere izango dira Sestaon. Osotara 43 traineruren partaidetza espero da.
11:00etan hasiko dira jaitsierako traineruak ateratzen. Barakaldoko Portu dartsenan izango da irteera, eta Portugalete aldean ziaboga bidezko bihurgunea egin ondoren, Kaikuren egoitzaren parean (La Benedictan) bukatuko dute. Hala, beteranoek, emakumeek eta Gazte Mailako ontziek 4.400 metro egingo dituzte; gizon seniorrek 6.000.
San Pedro, Portugaleten
Neguko jaitsierak aurrera doaz, horren seinale igandekoa Sestaon. Baina joan den asteburuan ere izan zen Nerbioi aldean beste jaitsiera bat, Portugaleteko San Nicolas XII. Traineru Jaitsiera. Han pasaitarren ordezkaria San Pedro izan zen Gizonen Senior Mailan. Zazpigarren izan ziren moreak sailkapen nagusian.
