"Azken minutuan sartutako gol bat bezain itsusia zara"
Areto futboleko talde nagusiak Donostian porrota jaso du, eta lidergoa galdu. Futboleko talde nagusientzako asteburu biribila izan da.
Italiako pareta batean norbaitek idatzi zuen “Sei bella come un gol al 90′! [90. minutuan sartutako gol bat bezain ederra zara!]”.
Perspektiba kontua da hori. Norbaitek gola sartzen badu, beste batek jaso duelako da. Oiartzungo areto futboleko talde nagusiaren kasuan, azkeneko minutuan jaso zuen gola itsusia izan zen.
Donostiako Antigua auzoan jokatu zuten ostiralean, eta partida ongi hasi zen, oiartzuarrak aurreratu baitziren. Bigarrena sartzeko aukera asko sortu zituzten arren, Antiguoko izan zen sareak zulatu zituena. Atsedenaldira iritsi baino lehen aurreratu ziren donostiarrak, bi gol sartuta.
Bueltan, etxekoek beste gol bat sartu zuten, baina oiartzuarrek hiruna berdintzea lortu zuten. Inertzia ona zuten oiartzuarrek, eta bazirudien gola lortuko zutela… antiguotarrek lortu zuten arte.
Lehen Mailako lidergoa galtzea suposatu zuen gol itsusi horrek.
Miren Tabernaren kasuan, Oarsoaldeko derbia jokatu zuen Ostiko Sindikato Tabernaren kontra. Oreretarrak aurreratu ziren, baina atsedenaldira iritsi aurretik etxeko taldeak buelta eman zion partidari.
Bigarren zatian, Ostiko indartsu hasi zen, eta berdintzea lortu zuen. Partida bukatzeko bost minutu falta zirela, Miren Tabernak hirugarrena sartu eta hiru puntuak etxean geratu ziren. Kasu horretan, ederra izan zen gola.
Futbolean, ongi
Oiartzun Kirol Elkarteko bi futbol taldeek garaipena lortu zuten, etxean. Emakumeek erakutsi zuten pasa den astekoa istripua izan zela, eta hiru gol sartu zizkioten Arratiari.
Hasieratik, Oiartzunek baloiaren jabetza izan zuen, eta aukerak asko sortu zituzten. Aldageletara joan aurretik lortu zituzten gol guztiak, Nahia eta Lizasoren —honek bi— bidez. Bigarren zatian jokoa berdindu zen, baina ez zen gehiagorako aukerarik egon.
Mutilen partidan, oiartzuarrak hobeak izan ziren, baina 60 minutura arte itxoin behar izan zuten markagailua mugitzeko, Seini esker. Hamar minutu geroago bigarrena sartu zuen Leonetek, Ordizia aukerarik gabe uzteko.
Emakumeen 3. RFEF Maila
- Oiartzun — Arratia: 3-0.
Gizonezkoen Ohorezko Erregional Maila
- Oiartzun — Ordizia: 2-0.
Emakumeen Euskal Liga
- Hernani — Oiartzun B: 1-1.
Gizonen Lehen Erregionala. Kopa M-1.
- Amara Berri B — Oiartzun B: 2-2.
Emakumeen Ohorezko Erregional Maila
- Elgoibar — Oiartzun C: 6-1.
Mutilen Gazte Mailako Euskal Liga
- Oiartzun — Indautxu: 2-3.
Mutilen Gazte Mailako Gorengo Maila
- Oiartzun B — Mundaiz: 1-0.
Mutilen Gazte Mailako Lehen Maila
- Beti Ona B — Oiartzun C: 2-2.
ARETO FUTBOLA
Gizonen Gipuzkoako Lehen Maila
- Antiguoko Bellmer — Oiartzun: 4-3.
Gizonen Gipuzkoako Bigarren Maila
- Miren Taberna — Ostiko-Sindikato Taberna: 3-2.
