Euskal Herria plazako aparkalekuko denbora kameren bidez neurtuko da
Gehienez, lehen bezala, ordu eta erdiko tartez gorde ahal izango da autoa bertan. Anbulatorioa pazienteentzako dela gogorarazi dute.
Udalak jakinarazi duenez, Euskal Herria plazako aparkalekuko denbora-muga kameren bitartez kontrolatuko du. Doako aparkalekua da, eta horren helburua da —gogorarazi du udalak— Done Eztebe plazako zerbitzu eta dendetatik autoa hurbil utzi ahal izatea.
Kameren bidezko jarraipena martxoaren 1ean sartuko da indarrean. Sartu eta ateratzen diren ibilgailuen matrikulak irakurriko ditu aparkalekuko sarreran jarri duten sistemak.
Txandaketa ordutegia ohikoa izango dela nabarmendu du udalak: Astelehenetik ostiralera 8:00etatik 20:00etara eta larunbatetan 8:00etatik 13:30era. Tarte horietan 90 minutu baino gehiago pasatzen duten ibilgailuei isuna jarriko zaiela jakinarazi du udalak. Isun hori etxera iritsiko da hemendik aurrera.
Automobilak denbora luzeagoz uzteko beharra dutenentzat, kaleko aparkalekuez gain, plazatik gertu doako beste bi aparkaleku estali ere badaudela gogorarazi du udal erakundeak. Landetxekoa da bat, eta bertan sei orduz utz daiteke ibilgailu pribatua. Bestea, Beheko Plazakoa da, eta hor muga hiru ordukoa izango da.
Ordutegia honakoa da: astelehenetik ostiralera 08:00etatik 14:30era; arratsalde eta asteburuetan ez dute mugarik.
Anbulatoriokoa, beharra dutenentzat
Udalak gogorarazi du anbulatorio ondoko aparkalekuak ere ordu eta erdiko muga zuela. Espazio horren erabilera osasun-etxera joaten diren oiartzuarrentzako lehenestea eskatu du udalak. Toki gutxi ditu aparkalekuak, eta haiek gaixo daudenei edo mugikortasun arazoak dituztenei gordetzeko galdegin du.
“Mesedez eskatzen diegu osasun zerbitzura joan behar ez dutenei autoa beste aparkalekuetan uzteko eta anbulatoriokoa bertako erabiltzaileentzat libre uzteko”, esan du udalak.
