PSE-EE, "asebeteta", Ziriza Etxearen behin betiko lagapenagatik
Atzo berretsi zuen albistea Espainiako Gobernuko Garraioen eta Mugikortasun Jasangarriaren Estatu idazkari Jose Antonio Santanok. PSE-EEk 2021ean portuko agintaritzarekin lortutako akordioak "exijitzeko" eskatu diote Teo Alberro alkateari.
Pasaiako PSE-EEk poza agertu du, Ziritza Etxearen behin-betiko lagapenagatik. Atzo berretsi zuen albistea Espainiako Gobernuko Garraioen eta Mugikortasun Jasangarriaren Estatu idazkari Jose Antonio Santanok. “Gaur bai, Ziriza pasaitarren eskuetara pasa da, sozialistek beti bultzatu dugun filosofiaren markoan”, esan dute lehenik Pasaiako taldekoek.
Sozialistek diote orain “Ziriza Etxearen etorkizuna zein izango den definitu eta erabaki behar” dela eta finantzazioa lortu behar dela horretarako, “Trintxerpek herritarren beharrak asebeteko dituen kultur espazioa izan dezan, gizarte garapenean eta ekonomikoan laguntzeko”.
PSE-EEkoek gogoarazi dute 2021ean (udaleko buru zirenean) akordio batera heldu zirela portuko agintaritzarekin, orduan abiatu zituzten eraikinaren lagapenerako tramite administratiboak. Orain, ordea, EH Bildu eta Podemosek osatutako udal gobernua albistea “argazkiak ateratzeko” baliatzen ari dela salatu dute, udalaren eta portuko agintaritzarekin lortutako akordioak “bultzatu eta exijitzen” aritu beharrean. “Beharrezkoa uste dugu egungo udal gobernuak bide honetan aurrera pausoak exijitzea, eta has daitezela, Ziriza Etxearekin gertatu den bezala, Donibaneko eraikina (liburutegia eta Juanba Berasategi aretoa biltzen dituena) udalari lagatzeko tramiteak egiten”.
Gaineratu duenez, azken udalbatzan gaiaz galdetu zioten sozialistek Teo Alberro alkateari, eta honek “dena paralizatuta” jarraitzen duela argudiatu zuela salatu dute. “Fida gaitezke gure galderen aurrean informazio okerra ematen digun alkate batez?”, esan dute, azkenik.
