Lanak eginda itzuli dira Oriotik
Hibaikaren hiru ontzi aritu ziren Oriako jaitsieran; Senior emakume eta gizonak, eta Gazte Mailako mistoa.
Hibaikako senior emakume eta gizonen ontziak Oriako jaitsieran. Argazkiak: Zuriñe Alberdi Lanak eginda, txukun gainera, itzuli ziren larunbatean Errenteria-Oreretara Hibaikako arraunlariak. Orioko Traineru jaitsieran aritu ziren arraun elkarteko hiru ontzi, senior emakume eta gizonak, eta Gazte Mailako ontzi mistoa ere. Saikolatik Orioko zubiraino bidea egin behar izan zuten, 4.000 metro Gazte Mailako eta Emakume Seniorren ontziek; 6.000 metro Senior Gizonenak.
Emakumeen ontzia seigarren sailkatu zen 17:16:51 denborarekin, Arraun Lagunak, Orio, Tolosaldea, Donostiarra eta Hondarribiaren ondotik.
Gizon seniorren ontzia, hemeretzigarren sailkatu zen, 22:28:10 denbora eginda. Gazte Mailako ontzi mistoa, berriz, parte hartu zuten lau ontzietatik azkena izan zen larunbateko jardunaldian, San Juan, Orio eta Kaikuren atzetik.
Orioko traineru jaitsiera urteko hirugarrena izan da, aurretik Portugalete eta Kaikun jokatu dituzte. Larunbateko erlojupekoan 86 ontzik hartu zuten parte. Ondoko bideoa, Goral Oreretak egindakoa da.
