San Pedro eta Batelerak, oso txukun Orian
'Libia' ontzia seigarren izan zen sailkapen nagusian, eta bueltan diren Batelerak, berriz, zazpigarren izan ziren.
Argazkiak: Sanpedrotarra Arraun Elkartea eta Josu Zelaiaran. Neguko traineru jaitsieretatik handiena jokatu zen larunbatean Oria ibaian, Orio Arraunketa Elkarteak antolatuta. Bertan Pasaiako sei ontzik parte hartu zuten, eta horien artetik lanik nabarmenena gizonetan San Pedrok eta San Juanen emakumeen traineruak egin zuten, bueltan diren Batelerek.
Eusko Label Ligara itzuli da San Pedro. Horri begirakoa da egiten ari diren prestaketa. Oriako jaitsiera otsailean izan da, oraindik dezente falta da ligaren hasierarako, ekainaren bukaerarako. Baina Libia ontziak larunbatean gizonen absolutuetan lortutako seigarren postuak meritu handia du, kontuan hartuta haren aurretik izan ziren bost traineruak (Urdaibai irabazlea, Donostiarra A, Ondarroa A, Hondarribia A eta Getaria) ligakide izango dituela, eta adibidez etxeko trainerua (Orio) atzean utzi zutela. Urdaibaik 20.24ko marka egin zuen, San Pedrok 21.04koa. Ondorio garbiak ateratzeko goizegi bada ere, bide onean doa moreen prestaketa.
Batelerak itzuli dira. Aurten berriz ere uretaratuko du San Juanek emakumeen trainerua. Oriako jaitsieran zazpigarren izan ziren sanjuandar gazteak, seigarren izan zen Hibaika hurbil-hurbil izan zutelarik, ehuneko eskasetara. Hau da, Orion aurretik EuskoTren Ligako traineruak bakarrik izan zituzten (Arraun Lagunak irabazlea, Orio, Tolosaldea, Donostiarra, Hondarribia eta Hibaika), eta ETE Ligan lehiakide izango dituzten denak atzean.
Gizonen absolutuetan San Juanen B eta A traineruak hamahirugarren eta hamabosgarren izan ziren hurrenez hurren. Probak egiten ari da oraindik ere Joseba Fernandez entrenatzailea. Hala behar du izan, otsailean gaudelako. San Juanen Gazte Mailako trainerua, ostera, irabazle izan zen bere kategorian Orioren, Kaikuren eta Hibaikaren aurretik.
Beteranoetan, Trintxerpe-Illunbe zortzigarren izan zen.
