Urmendiko lan-poltsa zabaldu dute
Irakasleen ordezkapenak egiteko lan-poltsa zabaldu dute. Hilaren 26an itxiko da izena emateko epea. Bi proba egin beharko dituzte.
Irakasleen ordezkapenetarako lan-poltsa osatzeko deialdia ireki du Urmendi Udal Ikastola Partzuergoak. Ordezkapenak egiteko eta hutsik dauden lanpostuak betetzeko erabiliko dute zerrenda. Oposizio-lehiaketa bidez zehaztuko dute hurrenkera, jakinarazi dutenez.
Hautagaiek Haur Hezkuntzako gradua eta 3. hizkuntza eskakizuna izan behar dute. Izena emateko epea hilaren 26an itxiko da, eta lan-poltsan sartu nahi dutenek e-posta bidez bidali beharko dituzte eskabideak.
Zein eginbehar izango dituzten azaldu dute: “Haurren garapen osoaren prozesuari dagozkion egoerez arduratuko dira haur-hezitzaileak: harreman afektiboak eta gizarte inguruarekiko harremanak; garbitasuna, elikadura eta atsedena; garapen kognitiboari eta adierazpenekoari lotutakoak, bai eta heziketa prozesuko uneari dagozkionak ere”.
Gainera, hezitzaileek familiak hartuko dituzte, eta haurren hezkuntza prozesuaren berri emango diete. Honako lanak ere egin beharko dituzte: funtzionamendu egokirako beharrezko koordinazio-bilera eta bestelakoetan parte hartu beharko dute, urteko lan programaketa pedagogikoa egin, martxan jarri eta ebaluatzeko, besteak beste.
Bi proba
Oposizioak bi proba izango ditu. Lehenengoan, 30 galderako galdetegia erantzun beharko dute (hainbat aukeren artean hautatu beharko da erantzun egokia). 30 puntu lortzeko aukera izango da honetan eta gutxienez 15 beharko dira gainditzeko.
Bigarrenean, gaitegi orokorrean jasota dauden gaiei buruzko balizko egoera praktikoei edota programazioari buruzko idatzizko garapena egin beharko dutela iragarri dute. Horrela, hiru gai landu beharko dituzte eta 10 puntu egongo dira jokoan bakoitzeko. Bigarren zatia gainditzeko ere gutxienez 15 puntu atera beharko dira.
Gainditzen dutenak lehiaketa fasera pasatuko dira, eta merezimenduak baloratuko zaizkie, hala nola hezitzaile gisa izan duten aurretiazko esperientzia, prestakuntza akademikoa eta ikastaroak.
Gipuzkoako Aldizkari Ofizialean argitaratu dituzte proben, aurkeztu beharreko dokumentazioaren eta deialdiaren xehetasun guztiak. Zalantzak argitzeko, 943 26 00 26 telefonora deitu dezakete interesatuek.
