Papresari emandako ingurumen baimen integratuari, helegitea
Baimenean jarritako mugak ez dira nahikoak Eguzkiren iritziz, pertsonen osasuna bermatu eta naturaren kontserbazio egoera ona babesteko.
Papresa Eusko Jaurlaritzako Ingurumen Jasangarritasuneko sailburuordetzak ingurumen baimen integratua eman zion Papresari iazko abenduaren 20an. Horren aurrean, helegitea jarri duela jakinarazi du Eguzkik. Batetik, baimena emateko erabakia hartu aurretik auzo elkarteek, herritarrek eta Eguzkik berak aurkeztutako alegaziori muzin egin ziela salatu du talde ekologistak. Halaber, alegazioa aurkezteko”epe eskasa” salatu zutela gogora ekarri du.
“Papresa enpresa potentzialki kutsakor gisa sailkatuta dago ingurumenean eta osasunean duen eraginagatik, eta horregatik, ingurumen baimen integratuarekin, mugak ezartzen dizkiote hainbat ingurumen parametroetan”, azaldu du Eguzkik. Gaineratu duenez, emandako baimenarekin lehenago atmosferara botatzen ez zuen kutsatzaile berri bat—S02—isurtzea onartuko diote Papresari.
Hori horrela, baimenean enpresari jarritako mugak “ez direla nahikoak” dio Eguzkik, “naturaren kontserbazio egoera ona lortzeko eta pertsonen osasuna bermatzeko, eta horrela azaldu dugu helegitean”. Harago jo du talde ekologistak, izan ere, haren iritzirako administrazio publikoak ez du behar bezala babestu ez ingurumena, ezta pertsonen osasuna, “eta ondorioz, ez da egoki betetzen ari legeak ezartzen dituen helburuak eta betebeharrak”.
Ezinbesteko jo du gainera, Eguzkik, “egungo egoera klimatiko larrian” kontaminazioa murriztea, “kontaminazioa murrizteko akordioak hartu dira 2030 eta 2040 urteetarako, hemen berriz ez dira murrizten, eta aipatu dugun bezala, kutsatzaile berriak isurtzea onartu da”.
Bi eskaera zehatz egin ditu Eguzkik helegitearen bidez. Batetik, zaratari dagokionez indarrean dagoen 213/2012 dekretua bete dadila; bestetik, atmosferara eta uretara isuritako kutsatzaileen eta sortutako usaien inguruan neurri zorrotzagoak ezar ditzatela. Bi irizpidetan oinarritu du eskaera Eguzkik, “lehena, enpresa hau 40.000 biztanle dituen herri baten erdigunean dagoela ez industrialde batean; bigarrena, Eusko Jaurlaritzak ahalmena duela legeak ezartzen dituzten neurriak baino murriztaileagoak ezartzeko”.
Bukatzeko, borondate kontua dela erabakia sinistuta azaldu da Eguzki: “Administrazio publikoak naturaren eta pertsonen osasuna hoebto zaintzeko eta bermatzeko neurriak hartu behar dituela zalantzarik ez dugu”
