Ikus-entzunezko bertso jarriak, 'Anonyme Popular'-ekin, martxoaren 10ean
Igor Elortzak eta Rafa Ruedak —besteak beste— sortutako ikuskizuna antolatu du Martzelina Bertsozale Elkarteak.
Martzelina Bertsozale Elkartearen ekimenez, Anonyme Popular ikuskizuna taularatuko dute Landetxeko auditorioan, martxoaren 10ean.
Ikus-entzunezko bertso jarriak dira ikuskizunaren ardatza. Igor Elortzarena bertsolariarenak dira hitzak eta berak jarriko du ahotsa. Rafa Ruedarenak dira, berriz, musika eta doinuak (behean ikus daiteke fitxa tekniko osoa).
Sarrerak salgai jarri dituzte, 8 euroren truke, udalaren sarreren webgunean.
Bestalde, datorren asteko larunbatean —hilaren 24— Tabuen kutxatik oholtzara bertso musikatuen emanaldiarekin gozatzeko aukera izango da.
Anonyme Popular
- Laburpena: Ikus-entzunezko bertso jarriak dakartza Anonyme Popular egitasmoak. Ni eta zu eta guaren arteko espazio labainkor horretan sartu bezala ez irteteko esperientzia eskaintzen digu, hitzez, doinuz eta irudiz.
Anonyme Popular edonor izan daiteke, eta, aldi berean, norbait da. Igor da. Inor. Bere izenean eta besteren abizenean arituz, nitasun garaikide erzdun bat dakar hitzetara Igor Elortza bertsolariak, gutartasun lanbrotsu baten erdian. Bere buruaz beste, besteon munduaz mintzatuz, ispilu deseroso eta maitekor baten aurrez kokatzen gaitu guztiok.
Bertsoen hitzaren eta ahotsaren jarrera bereizgarri berekoak dira Rafa Ruedarekin landu dituen doinuak eta soinuak ere. Rapa, trapa, popa, funkya, mundurako erritmoak… Bertso-kantaro aurkituko da sorpresaz entzulea, aldiro, aldiaren kontraesanetara ertz ezberdinetik hurbiltzeko.
- Fitxa teknikoa
- Ideia eta zuzendaritza artistikoa: Igor Anonyme Popular.
- Hitzak eta ahotsa: Igor Elortza Aranoa.
- Doinuak eta soinua: Rafa Rueda Etxebarria.
- Ikus-entzunezko narrazioak: Kulturaz kooperatiba.
- Aholkularitza eszenikoa: Oier Zuñiga.
- Irudigintza eta dirudigintza: Gotzon Garaizabal eta Malen Amenabar.
- Erritmo eta gailuak: Alvaro Olaetxea.
- Soinu teknikaria: Jose Lastra.
- Iraupena: 60-70 minutu.
