Eskualdean trebakuntza eta jarduera ekonomikoa sustatzera dator Ikas Faktoria
Oarsoaldea Garapen Agentziak plataforma berri bat aurkeztu du, interkonektatutako aktiboen sare batean oinarritzen dena. Helburu bikoitza du: "eskualdean trebakuntza indartzea eta jarduera ekonomiko espezializatuaren sorrera sustatzea".
Oarsoaldea Garapen Agentziak Ikas Faktoria izeneko egitasmoa aurkeztu du. Dinamizazio plataforma bat da, helburu bikoitza duena: “eskualdean trebakuntza indartzea” batetik, eta “jarduera ekonomiko espezializatuaren sorrera sustatzea” bestetik.
Egitasmo honekin eskualdeko talentuaren prestakuntza enpresen eta komunitatearen eskaerekin lerrokatu nahi dute.
Plataforma interkonektatutako aktiboen sare batean oinarritzen da (hemen kontsulta daiteke) eta sare honek, “etengabe hedatzen ari denak” agentziako iturrien arabera, hezkuntza, zientzia, teknologia eta enpresa instalazioak biltzen ditu, “aurrerapen teknologikoetara egokituz eta proiektu estrategikoetan aldez aurretik egindako inbertsioak aprobetxatuz”. Finean, tokiko egitasmoei mesede egin nahi die proiektuak.
Plataforma honetan ikasketa ibilbide egokituak, testak egiteko eta esperimentatzeko espazioak eta etengabeko berrikuntza eta ikaskuntza sustatuko duen ekosistema dinamikoa sustatuko dute, ikasleek zein profesionalek erabili ahalko dutena. “Ikas Faktoriarekin, Oarsoaldeak hezkuntzan eta garapen ekonomikoan inbertitzeaz gain, etorkizun oparo eta iraunkorrerako oinarriak ezartzen ditu. Plafatormak konpromiso ausarta du bikaintasunarekin, lankindetzarekin eta biharko erronketarako prestaketekin”, erantsi dute iturriek.
