Tentsio handiko eremu izendatzeko bi baldintzetako bat betetzen du Pasaiak

Etxebizitzaren Euskal Behatokiak (EEB) emandako datuen arabera, errenta ordaintzeko esfortzu ekonomikoa igo egin da pasaitarren artean, %35,4ra igo baita hileko bataz besteko alokairu errenta.

Pasaiak tentsio handiko eremu izendatzeko baldintzetako bat betetzen du. Hain zuzen, honako baldintza betetzen du herriak: bizilagunek euren diru-sarreren %30 baino gehiago alokairuak eta etxebizitza-gastuak ordaintzeko bideratzea. Izan ere, Etxebizitzaren Euskal Behatokiak (EEB) emandako azken datuen arabera, errenta ordaintzeko esfortzu ekonomikoa igo egin da pasaitarren artean, behatokiak ezarritako %30ekoa baino handiagoa izan baita: %35,4ra igo da hileko bataz besteko alokairu errenta. Beraz, pasaitarrak dira euren alokairua ordaintzeko esfortzu handiena egin behar duten Gipuzkoako herritarrak.

Betetzen ez duen bigarren baldintza honakoa da: azken bost urtean bertako alokairuen prezioak KPIa baino hiru puntu gehiago igo izana. Pasaiaren kasuan, %14,6 igo da, hau da, ez da KPIa baino hiru puntu gehiago igo (KPIaren igoera %14koa izan baita).

Bi baldintzak bete ez arren, horietako bat betetzea nahikoa da eskaera ofiziala egiteko. Joan den urrian eskatu zuen udalbatzak Pasaia tentsio handiko eremu izendatzeko. EH Bildu, PSE-EE eta Podemos alderdien aldeko bozkekin eta EAJren abstentzioarekin egin zuen aurrera mozioak. Orain, ikusirik herriak bi baldintzetako bat betetzen duela, eskaera egin beharko du udalak Eusko Jaurlaritzan.

 

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.