'The Old Oak' filma, Landetxeko hurrengo proiekzioa
Ostegun arratsaldean emango dute filma. Ikatz-meategiak itxi ondorengo gainbeheran dagoen komunitate bati buruzkoa da filma.
'The Old Oak' filmaren irudi bat. Ostegun arratsaldeak ikus-entzunezkoetarako izan ohi dira Oiartzunen. Bihar arratsaldean —hilak 22— The Old Oak filma emango dute.
Ken Loach zuzendari britaniarrak zuzendu du filma, Paul Lavertyren gidoiarekin. The Old Oak (Haritz Zaharra, ingelesez) pub bat da, ikatz-meategiak zituen haran bateko azkena.
Emanaldia 19:30ean hasiko da, eta sarrerak eskuragarri daude, 3 euroan, udalaren sarreren webgunean.
Sinopsia
Durham, 2016an. The Old Oak pubaren jabea da TJ Ballantyne. Dibortziatuta dago, eta semeak ez du harekin hitz egiten. Herritarrak biltzen diren lekua da puba; garai batean bertako meategiak ustiatzeaz bizi ziren herritarrak, eta egun amorruz beteta elkartzen dira herriaren egoeraz kexatzera: ez dira errekuperatu haien ogibide ziren meategien itxieratik, etxebizitzen espekulazioaren eraginak bizi dituzte, eta herritar asko pobrezian bizi dira.
Autobus bat iritsiko da orduan herrira: bertan Siriako errefuxiatuak daude, gobernuak herrian ostatu eman die eta. Bizilagunen harrera bortitza izango da: mehatxu bezala ikusiko dituzte, eta konfiantzarik ezarekin eta biolentziaz hartuko dituzte. TJ Ballantynek, ordea, haren tabernako atzealdeko gela irekiko du komunitatearentzat, bai siriarrentzat, bai bertakoentzat, afariak eskaintzeko.
